Te Ke Fai ʻa e Finangalo ʻo Sihová?

ʻOku mau fakamālō atu ʻi hoʻo vaheʻi ʻa e taimi ke vakaiʻi ai ʻa e polosiua ko ení koeʻuhi ke ke maheni tonu ai mo e Kau Fakamoʻoni ʻa Sihová ʻi he tuʻunga ko ha kakaí, ke ako fekauʻaki mo ʻemau ngaahi ngāué, pea ke sio ai ki he ngāue ʻa ʻemau kautahá. ʻOku mau ʻamanaki pē kuo tokoniʻi ai koe ke ke ʻiloʻi pau ko kimautolu ia ʻa e faʻahinga ʻoku mau fai ʻa e finangalo ʻo Sihová ʻi he ʻaho ní. ʻOku mau fakalototoʻaʻi koe ke ke hanganaki hoko ʻo ʻiloʻi ʻa e ʻOtuá, ke talanoa ki he toenga ʻo ho fāmilí mo e ngaahi kaungāmeʻá fekauʻaki mo e meʻa ʻokú ke akó, pea feohi maʻu pē mo kimautolu ʻi heʻemau ngaahi fakataha faka-Kalisitiané.—Hepelū 10:23-25.

Te ke ʻiloʻi ai ko e lahi ange hoʻo ako fekauʻaki mo Sihová, ko e lahi ange ia ʻa e malava ke ke sio ki he lahi ʻo ʻene ʻofa moʻoni ʻiate koé. ʻE ueʻi leva ai koe ke ke fai ʻa e meʻa kotoa pē te ke malavá ke toe fakahāhā foki ai ʻa hoʻo ʻofa kiate iá. (1 Sione 4:8-10, 19) Ka ʻe lava fēfē ke ke fakahāhā ʻa e holi ko iá ʻi hoʻo moʻui fakaʻahó? Ko e hā ʻoku lelei taha ai kiate koe ke ke talangofua ki heʻene ngaahi tuʻunga fakaeʻulungāngá? Pea ko e hā te ne tokoniʻi koe ke ke loto ai ke fai ʻa e finangalo ʻo e ʻOtuá fakataha mo kimautolú? Ko hoʻo faiako Tohi Tapú ʻe fiefia ke kumi fakataha mo koe ʻa e ngaahi talí koeʻuhí ke ke lava ai mo ho fāmilí ʻo “tauhi kimoutolu ʻi he ʻofa ʻa e ʻOtuá, . . . fakataha mo e vakai atu ki he moʻui taʻengatá.”—Sute 21.

ʻOku mau fakaafeʻi loto-māfana atu koe ke hokohoko atu hoʻo laka ki muʻa ʻi he hala ʻo e moʻoní ʻaki hono ako ʻa e tohi hono hoko Tauhi Kimoutolu ʻi he ʻOfa ʻa e ʻOtuá.