Akoʻi ʻe Sīsū ki Heʻene Kau Ākongá ʻa e Founga ke Lotu Aí

Naʻe fai ʻe he kau Fālesí ʻa e meʻa kotoa pē ke maongo ki he kakaí. Kapau naʻa nau fai ha meʻa anga-ʻofa, naʻe fai iá ke ʻiloʻi ʻe he niʻihi kehé. Naʻa nau lotu ʻi he feituʻu kakaí koeʻuhi ke lava ʻo sio mai kiate kinautolu ʻa e tokotaha kotoa. Naʻe ako maʻuloto ʻe he kau Fālesí ʻa e ngaahi lotu lōloa pea toutou leaʻaki ia ʻi he ngaahi sinakoké pea ʻi he ngaahi tuliki halá ʻa ia naʻe malava ke fanongo mai ai kiate kinautolu ʻa e niʻihi kehé. Ko ia naʻe ʻohovale ʻa e kakaí ʻi hono tala ange ʻe Sīsū: ‘ʻOua te mou lotu ʻo hangē ko e kau Fālesí. ʻOku nau pehē ʻe maongo ki he ʻOtuá ʻa e lahi ʻo ʻenau ngaahi leá, ka ʻoku ʻikai. Ko e lotú ko koe pē ia mo Sihova. ʻOua ʻe toutou leaʻaki ʻa e meʻa tatau. ʻOku fiemaʻu mai ʻe Sihova ke ke tala ange ʻa e anga ʻo hoʻo ongoʻi moʻoni ʻi lotó.

‘ʻOku totonu ke peheni hoʻomou lotú: “Ko ʻemau Tamai ʻoku ʻi hēvani, ke fakamāʻoniʻoniʻi ho huafá. Ke hoko mai ho Puleʻangá. Ke fai ho finangaló, ʻo hangē ko ia ʻi hēvaní, ke pehē foki ʻi māmani.”’ Naʻe toe tala ange ʻe Sīsū ke nau lotu ʻo kole haʻanau meʻakai ki he ʻaho ko iá, ke fakamolemoleʻi ʻenau ngaahi angahalá, pea ke nau lotu fekauʻaki mo e ngaahi meʻa fakafoʻituitui kehe.

Naʻe pehē ʻe Sīsū: ‘ʻOua ʻaupito ʻe tuku hoʻomou lotú. Hokohoko kole ki hoʻomou Tamaí, ʻa Sihova, ha ngaahi meʻa lelei. Ko e mātuʻa kotoa pē ʻokú ne loto ke ʻoange ʻa e ngaahi meʻa lelei ki heʻene kiʻi tamá. Kapau ʻoku kole atu ho fohá ha foʻi mā, te ke ʻoange kiate ia ha foʻi maka? Kapau te ne kole atu ha mataʻiika, te ke ʻoange kiate ia ha ngata?’

Naʻe fakamatalaʻi leva ʻe Sīsū ʻa e lēsoní: ‘Kapau ʻokú ke ʻilo ʻa e founga ke foaki ai ʻa e ngaahi meʻaʻofa lelei ki hoʻo fānaú, fēfē ai hoʻo Tamaí, ʻa Sihova, te ne foaki atu ʻa hono laumālie māʻoniʻoní kiate koe? Ko e meʻa pē ʻoku fiemaʻu ke ke faí ko e kole.’ ʻOkú ke muimui ki he fakahinohino ʻa Sīsuú? Ko e hā ʻa e ngaahi meʻa ʻokú ke lotu fekauʻaki mo iá?