ʻOkú Ke Fakaʻamu ki ha Taimi ʻa ia . . .
□ te ke malava ke ongoʻi malu ai ʻi ho ʻapí—tatau ai pē pe ko e taimi fē ʻi he ʻahó?
□ ʻe ʻikai ke toe fiemaʻu ai ha ngaahi loka, ngaahi pā, ngaahi meʻa fakatokanga, ngaahi ava ʻi he matapā ke fakasiosio ai, ngaahi ʻā, kau leʻo, fanga kulī leʻo, mo e ngaahi meʻa maluʻi kehé?
□ ʻoku lava ke ke ʻalu tokotaha pē ʻi he ngaahi halá ʻi he malu moʻoni, naʻa mo e taimi poʻulí?
□ ko e ngaahi faitoʻo kona fakatuʻutāmakí mo honau ngaahi palopalema ʻo fekauʻaki mo iá ʻe hoko ko e meʻa pē ʻo e kuo hilí?
□ kuo tuku ʻa e tau hono kotoa pē, pea ko e ngaahi mahafu taú ʻe ʻikai ke toe ngaohi pe fokotuʻuna hono tauhí?
□ ʻe ʻikai te ke toe hohaʻa ʻo kau ki he meʻakai, ʻea, mo e vai kuo ʻuliʻi?
□ ʻe toʻo ʻaupito ʻa e tautoitoí, puke fakamālohí, mo e fakamanamana ʻo e ngaahi pomú?
□ ko e ngaahi koloa fakaenatula ʻo e māmaní ʻe maluʻi ia, tauhi, pea ngāue fakapotopotoʻaki ki he lelei fakalūkufua pē?
□ ko e mānumanú mo e siokitá ʻe ʻikai ke kei hoko ko e ngaahi mālohi ʻi he lotolotonga ʻo e faʻahinga ʻo e tangatá?
□ ko e fānaú te nau tauhimaʻu ʻenau tuʻunga taʻe melé mo ʻapasia ki he niʻihi kehé mo ʻenau ngaahi koloá?
□ ko e kakai fefiné ʻe ʻikai ke ngaohikoviʻi mo fakafaikehekeheʻi?
□ ko e ngaahi laó mo e ngaahi tuʻutuʻuní ʻe lelei pea ʻe fakahoko pē ia ʻi he totonu ki he lelei fakalūkufuá?
□ ko e puleʻangá te ne fai ʻa e ngaahi filí ʻo makatuʻunga ʻi he ngaahi fiemaʻu moʻoní kae ʻikai ko e taumuʻa fakapolitikale?
□ ko e tauʻatāiná mo e ʻai ke tataú ʻe ʻikai ke lau pē ka ʻe ngāueʻaki foki?
□ ʻe ʻikai ke ʻi ai ha masiva, ka ʻe maʻu ʻe he tokotaha kotoa pē ʻa ia pē ʻoku fiemaʻu ki heʻenau moʻuí, lelei, mo e fiefia?
□ ko e fānaú ʻe fiemaʻu mo tauhi pea ʻe ʻikai ʻaupito ngaohikoviʻi pe liʻekina?
□ kuo ʻosi ikunaʻi ʻa e mahakí mo e maté, pea ʻe ʻikai ke kei ʻi ai ha ngaahi mahaki fakaʻauha fakamanavahē?
□ ko e tokotaha kotoa pē te ke fetaulaki mo ia ʻe angaʻofa, fietokoni, mo falalaʻanga?
□ ko e moʻui ʻa e tokotaha kotoa pē ʻe fakamahuʻingaʻi moʻoni, pea ʻe maʻu ʻe he tokotaha kotoa pē ʻa e fiefia ʻoku tolongá?
□ ʻe ʻikai ke kei hoko ʻa e lotu ko ha mālohi fakamavahevahe, ʻa ia ʻoku iku ai ki he ʻikai ke makātakiʻi ʻa e ngaahi tui kehé, taaufehiʻa, mo e ngaahi tau?
□ ʻe maʻu ʻe he tokotaha kotoa ʻa e feituʻu feʻunga mo lelei ke nofo ai, pea ko e ʻikai ha ʻapí ko e meʻa pē ia ʻo e kuo hilí?
Kapau te ke lava ke ke pehē ʻio ki ha taha ʻo e ngaahi fehuʻi ʻi ʻolungá, ʻe fakamānako kiate koe hono lau ʻa e ngaahi kupu ʻoku hoko maí.