ʻOkú Ke Manatuʻi?

Kuó ke ʻilo ʻoku ʻaonga kiate koe ʻa e ngaahi ʻīsiu fakamuimui ko ʻeni ʻo e Ko e Taua Leʻo? Ko ia fēfē ke ke ʻahiʻahiʻi ai leva ʻa hoʻo manatú ʻaki ʻa e ngaahi meʻa ko ʻeni ʻoku hoko maí:

▫ Ko e hā ʻa e tefitoʻi ʻuhinga ʻo e fakamoʻui naʻe fai ʻe Sīsū?

ʻOku fakahāhā ai, ko e fakalototoʻaʻi ʻo e fuʻu kakai lahi ʻoku hangē ha fanga sipí ʻi he ʻaho ní, ko e kau hao moʻui atu ʻi ʻĀmaketoné, ʻe fakamoʻui kinautolu ʻi he ʻosi ha vahaʻa taimi ʻi he hili ʻo ʻĀmaketoné. (ʻAisea 33:24; 35:​5, 6)​—4/1, peesi 14.

▫ Ko e hā ʻoku fiemaʻu ai ke toutou fakamanatuʻi ke tau: “Fakakukafi [kītaki, NW] ʻi he lotu”? (Loma 12:12, PM)

Ko e ngaahi faingataʻá mo e ngaahi fatongia ʻo e moʻuí ʻe malava ke nau fakamafasiaʻi nai kitautolu ʻo fuʻu lahi ʻi he taimi ʻe niʻihi pea ngalo ai ke tau fai ha lotu. Pe ko ʻetau ngaahi palopalemá ʻe lava nai ke fōngia ai kitautolu mo fakatupunga ke mole ʻa e fiefia ʻi he ʻamanaki ki he Puleʻangá, pea aʻu ʻo tuku ai hono fai ʻo e lotú. Ko ia ai, ʻoku fiemaʻu kiate kitautolu ha ngaahi fakamanatu ke fakalototoʻaʻi kitautolu ke tau lotu pea ʻi he foungá ni te tau toe ʻunuʻunu ʻo ofi ange ai kia Sihova.​—4/1, peesi 16.

▫ Ko e hā ʻoku ʻai ke mahino ʻe he ngaahi ʻuhinga fakamatala fakaesiasi ʻo kau ki he Tolu-tahaʻi-ʻotuá?

ʻOku hā mahino mei ai ko e tokāteline ʻo e Tolu-tahaʻi-ʻotuá ʻoku ʻikai ko ha fakakaukau faingofua. Ka, ko ha ngaahi fakakaukau fihi mavahevahe kuo ʻomai fakatahaʻi ʻi ha ngaahi senituli ʻo nau femaʻutaki. Ko e kau poto mataotao tokolahi, ʻo kau ki ai mo e kau tui ki he Tolu-tahaʻi-ʻotuá, ʻoku nau tala ko e moʻoni ʻoku ʻikai ke ʻi he Tohitapú ha tokāteline moʻoni ʻo ha Tolu-tahaʻi-ʻotua.​—4/1, peesi 23-4.

▫ Ko e hā ʻa e kī ki he lotu faka-Kalisitiane moʻoní?

Ko e ʻofá ko e kī ia ki he lotu faka-Kalisitiane moʻoní. ʻOku mātuʻaki mahuʻinga mo taʻealaliʻaki ʻa e tui, ngaahi ngāue, mo e feohi totonu, ka ʻi he ʻikai ke kau ai ʻa e ʻofá ʻoku ʻikai ke ʻi ai hanau ʻaonga. ʻOku pehē ʻení koeʻuhi ko Sihová ʻokú ne tuʻu-ki-muʻa ko e ʻOtua ʻo e ʻofa. (1 Kolinitō 13:​1-3; 1 Sione 4:8)​—8/1, peesi 21.

▫ Ko e hā ʻa e ʻuhinga ʻo e fakakehe ʻa Sīsū kiate kitautolu he ʻaho ní? (Maʻake 9:​2-4)

ʻOku malava ʻe he fakakehé ke ne langaʻi ʻa e tui ki he folofola fakaekikite ʻa Sihová pea mo fakatupu mālohi ange ʻa ʻetau tui kia Sīsū Kalaisi ʻi he tuʻunga ko e ʻAlo ʻo e ʻOtuá pea ko e Mīsaia ia naʻe talaʻofá. ʻOku toe malava ke ne ʻai ke mālohi ange ʻa ʻetau tui ki he toetuʻu mai ʻa Sīsū ki he moʻui fakalaumālié pea ke ʻai ke lahi ange ʻa ʻetau tui ki he founga-pule ʻa e ʻOtuá.​—8/1, peesi 31.

▫ Ko e hā ʻokú ne fakamoʻoniʻi kuo fuʻu maongo loloto fau ki he faʻahinga ʻo e tangatá ʻa e Lōmaki ʻi he ʻaho ʻo Noá?

Kuo fakafuofua ʻoku lahi hake ʻi he ngaahi talatupuʻa ʻe 500 ʻo kau ki he Lōmakí ʻa ia ko e fai ʻe he ngaahi matakali mo e ngaahi faʻahinga kakai lahi ange ʻi he 250. ʻI he ngaahi talatupuʻá ni kotoa, ʻoku ʻi ai ʻa e ngaahi tefitoʻi meʻa meimei tatau.​—9/1, peesi 5.

▫ Ko e hā ʻa e meʻa ʻoku fepaki mo e lau ko Pita ko e ʻuluaki ʻepikopō ʻo Lomá?

ʻOku ʻikai ha fakamoʻoni naʻe ʻaʻahi ʻa Pita ki he kolo ko ia ko Lomá ʻi ha taimi; pea ʻikai ʻaupito ke lave ʻa Pita kiate ia tonu pē ʻi ha taimi ʻo kehe ia mo ʻene fakahā ko hono tuʻungá ko e taha ʻo e kau ʻapositolo ʻa Kalaisí. (2 Pita 1:1)​—9/1, peesi 28.

▫ ʻI he founga fēfē ʻoku tatau ai ʻa e kau palōfita loi ʻi he ʻaho ní mo kinautolu ʻi he taimi ʻo Selemaiá?

ʻOku taukaveʻi ʻe he kau palōfita loi ʻo e ʻaho ní ʻoku nau fakafofongaʻi ʻa e ʻOtuá, ka ʻoku nau kaihaʻasi ʻe kinautolu ʻa e ngaahi lea ʻa e ʻOtuá ʻaki ʻa ʻenau malangaʻi ʻa e ngaahi meʻa ʻokú ne fakaleluʻi ʻa e kakaí mei he meʻa ʻoku leaʻaki moʻoni ʻe he Tohitapú. ʻOku tautefito ʻa e moʻoni ení ʻi he fekauʻaki mo e akonaki ʻo kau ki he Puleʻangá. (Selemaia 23:30)​—10/1, peesi 4.

▫ Ko e hā ʻoku kole ʻe he kau ʻofa ki he ʻOtuá ʻi he taimi ʻoku nau lotu ai ke hoko mai ʻa e Puleʻanga ʻo e ʻOtuá? (Mātiu 6:10)

ʻOku nau kole ke fai ʻe he Puleʻanga fakahēvani ʻo e ʻOtuá ha ngāue pau ʻaki hono fakaʻauha ʻa e ngaahi founga-pule kuo faʻu ʻe he tangatá ʻa ia kuo ʻikai te nau malava ke fakahoko ʻenau talaʻofa fekauʻaki mo hono ʻomai ʻo e melinó mo e maluʻangá. (Tāniela 2:44)​—11/1, peesi 6.