“Ko e Aka ʻE Taʻemaueʻi”

ʻI HE lotolotonga ʻo e meʻamoʻui lahi taha mo moʻui fuoloa taha ʻi māmaní ʻoku kau ai ʻa e ʻakau ko ia ko e sequoia ʻo California. Ko e fuʻu ʻakau tupu kāfakafa ko ʻení ʻoku tupu ʻo aʻu ki he mita ʻe 90 ʻa hono māʻolungá ʻi heʻene aʻuaʻú pea ʻoku moʻui atu ʻi he taʻu ʻe 3,000.

Neongo ko e vakai ki he sequoia ʻoku fakamanavahē, ko e anga ʻa hono ngaahi aka ʻoku ʻikai lava ʻo sio ki aí ʻoku ʻikai lava ke fakatataua. ʻOku maʻu ʻe he ʻakau ko e sequoia ʻa e ngaahi aka ʻoku hangē ha falá ʻoku lahi ʻa e feituʻu ʻokú ne aʻusia ki aí ki he ʻeka ʻe tolu pe fā. Ko e fuʻu aka ko ení ʻokú ne fakamaʻu fefeka ia ʻi he taimi ʻoku tāfea ai ia pe matangi lahí. ʻOku toe malava foki ʻe he sequoia ke ne matuʻuaki ha fuʻu mofuike mālohi!

Naʻe fili ʻe he Tuʻi ko Solomoné ʻa e aka mālohi ʻo ha ʻakau ʻo ngāueʻaki ia hangē ko ha lea fakatātā ia ʻi he taha ʻo ʻene ngaahi palōvepí. Naʻá ne pehē: “ʻE ʻikai kau ʻa e angahala ʻa ha tangata ke ne matuʻu ai: Ka ko e aka ʻo e faitotonu ʻe taʻemaueʻi.” (Palōvepi 12:3) ʻIo, ko e kau angahalá ʻoku nau tuʻu fakamakateka. Ko ʻenau ngaahi malava ʻoku nau lava ʻo maʻú ʻoku fakataimi pē, he ʻoku talaʻofa ʻe Sihova “ko e ʻamanaki ʻa e angahala ʻe ʻauha.”​—Palōvepi 10:28.

Ko e fakatokanga ia ki he faʻahinga ʻoku nau taku ko e kau Kalisitiane kinautolú, he naʻe pehē ʻe Sīsū ʻe ʻi ai ʻa e faʻahinga ʻe “ʻikai ha aka” ʻiate kinautolu pea te nau tūkia. (Mātiu 13:21) ʻIkai ko ia pē, naʻe tohi ʻe he ʻaposetolo ko Paulá ʻo fekauʻaki mo e niʻihi ʻe “felīlīʻaki mo feʻaveaki fano ʻe he matangi fakaakonaki [loi].” (ʻEfesō 4:14) ʻE anga-fēfē hono taʻofi ʻa e meʻa ko ʻení?

Hangē ko ia ko e mafolalahia ʻa e aka ʻo e sequoia ʻi he kelekele lelei ʻo e funga fonuá, pehē ʻoku fiemaʻu ke tau fai ha fekumi loloto ʻaki hotau ʻatamaí mo e lotó ʻi he Folofola ʻa e ʻOtuá pea ʻutu mei hono ngaahi vai fakatupu-moʻuí. ʻOku tokoni ʻeni kiate kitautolu ke tau fakatupulekina ʻa e tui ʻoku faiaka mālohi. Ko e moʻoni, te tau ongoʻi nai ʻa e ngaahi uesia ʻa e ngaahi faingataʻaʻia hangē ha matangí. Te tau tetetete nai, hangē ha fuʻu ʻakaú, ʻi he taimi ʻo e tuʻutāmakí. Ka kapau ko ʻetau tuí ʻoku faiaka mālohi, te tau fakamoʻoniʻi ai ʻoku tau maʻu ha “aka ʻe taʻemaueʻi.”​—Fakafehoanaki mo Hepelū 6:19.