ʻOku Nau Maʻu mei Fē Honau Mālohí?
KAPAU te ke sio ofi angé ki he kiʻi pepe ʻi he fakatātaá ni, te ke sio ai ki he taha ʻo hono kapakau ʻe faá ʻoku ʻikai pē ke ʻi ai hano ʻaonga. Ka, ʻoku hokohoko atu ʻa e pepé ke kai mo puna holo. ʻOku ʻikai ko ha meʻa ʻeni ia ʻoku laulōtaha ʻene hokó. Kuo faʻa fakatokangaʻi ʻa e fanga kiʻi pepé ia ʻoku nau ʻalu takai ʻi heʻenau ngāue fakaʻahó mo e peseti ʻe 70 honau kapakaú ʻoku mole.
ʻI he tuʻunga meimei tatau, ʻoku fakahāhā ʻe he kakaí ha ongoʻi loto-maʻu. Neongo ʻa e mamahi mei he ngaahi palopalema lahi fakaeongó mo fakasinó, ʻoku ʻikai te nau foʻi.—Fakafehoanaki mo 2 Kolinitō 4:16.
Ko e ʻaposetolo ko Paulá naʻá ne kātakiʻi ʻa e ngaahi faingataʻa lahi fakafoʻituitui lolotonga ʻa ʻene ngaahi fefonongaʻaki fakamisinalé. Naʻe kauʻi maea ia, haha, tolomakaʻi, pea tuku pilīsone. Tānaki atu ki ai, naʻá ne fuesia ha faʻahinga vaivaiʻanga kehe, mahalo ko ha palopalema ʻi hono matá, ʻa ia naʻe hangē ha “tolounua i he kakano” kiate ia.—2 Kolinitō 12:7-9, PM; Kalētia 4:15.
Ko ha mātuʻa Kalisitiane naʻe hingoa ko David, ʻa ia naʻá ne fetakai mo e lōmekina lahi ʻe he loto-mafasiá ʻi he ngaahi taʻu lahi, ʻo ne tui ko e mālohi ʻo Sihová naʻe mahuʻinga ki heʻene toe moʻui leleí. “ʻI he ngaahi taimi lahi, ko e ngaahi fakalakalaka naʻe faingataʻa ke maʻú ʻoku ngalingali ʻe toe mole atu ia,” ko ʻene fakamatalá ia. “ʻI he fehangahangai mo e fakalotosiʻi peheé, naʻá ku luva atu au kia Sihova, pea naʻá ne hokohoko atu hono tokangaʻi aú. Naʻe ʻi ai ʻa e ngaahi tuʻunga naʻá ku lotu ai ʻo laulau houa ʻi ha taimi. ʻI he taimi naʻá ku lea ai kia Sihová, naʻe mole atu ʻeku ongoʻi taʻelatá mo ʻikai haku ʻaongá. Naʻá ku fetakai ʻi ha vahaʻa taimi mo e ngaahi vaivaiʻanga lahi, kae fakamālō kia Sihova, mei he ngaahi vaivaiʻangá ni kuó u maʻu ai ha mālohi—naʻa mo e mālohi ke tokoniʻi ʻa e niʻihi kehé.”
Naʻe fakaivia ʻa Paula ʻe Sihova ko e ʻOtuá. Ko ia ai, ʻokú ne pehē: “He kau ka vaivai, ko ʻeku toki malohi é.” (2 Kolinitō 12:10) ʻIo, ko e ngaahi vaivaiʻanga ʻo Paulá naʻá ne akoʻi ia ke ne falala ki he mālohi kuo foaki ʻe Sihová. “ʻOku ou mafeia ʻa e meʻa kotoa pe ʻiate ia ʻoku ne fakakaukaua au,” ko e lea ia ʻa e ʻaposetolo ko Paulá. (Filipai 4:13) Kuo pau ke fakaivia ʻe Sihova ʻa ʻene kau sevānití.