Tui ki he ʻOtuá—ʻOku Fiemaʻu Nai ki Ai ha Mana?
NAʻE kamata ʻa e fekumi ʻa Albert ki he ʻOtuá ʻi hono taʻu 20 tupu siʻí. Naʻá ne vakaiʻi ha ngaahi lotu kehekehe ka naʻá ne kei taʻefiemālie pē. ʻI hono lau ʻo e ngaahi konga ʻo e Tohitapú, naʻá ne ako ai ki he founga angafai ʻa Sihova ki he faʻahinga tāutaha hangē ko ia ko Noa, ʻĒpalahame, Sela, pea mo Mōsese. Naʻe fakatokangaʻi ʻe Albert kuo tohoaki ia ki he ʻOtua ʻo e Tohitapú. Kae kehe, naʻá ne malava ai ke fakapapauʻi ʻoku ʻi ai moʻoni ha ʻOtua?
ʻI ha efiafi ʻe taha naʻe lele atu ai ʻa Albert ki ha feituʻu mavahe ʻo fai ai ʻene lotu, “Fakamolemole ʻe ʻOtua, ʻomi muʻa kiate au ha fakaʻilonga—ha faʻahinga meʻa pē ke u fakamoʻoniʻi ai ʻokú ke ʻi ai.” Naʻe tali mo tali ʻa Albert. ʻOkú ne manatu ki he taimi ko ia naʻe ʻikai hoko ai ha meʻá, ko ʻene fakatuʻamelié “naʻe maliu ia ki he ʻamanaki tōnoa, ki he koto ngeʻesi, ki he ʻita.”
Hangē pē ko Albert, ʻoku ongoʻi ʻe he faʻahinga tokolahi ia kuo kulanoa pē ʻenau fekumi ki he ʻOtuá. Mahalo pē naʻe fakapuputuʻuʻi kinautolu ʻe he ngaahi malanga ʻa e kau faifekaú pe fakaʻamanakiʻi ʻe he pōtoʻi ngutu ko ia ʻo e kau malanga fakaʻevangeliō ʻi he televīsoné. ʻI hono uesia ʻe he mālualoi ʻoku hoko moʻoni ʻi he lotolotonga ʻo honau ngaahi kaungāʻapi lahi, kuo ʻikai fakapapauʻi ai ʻe he niʻihi ia pe ko fē te nau tui ki aí. Neongo ia, naʻe fakapapauʻi ange ʻe Tuʻi Tēvita ʻo ʻIsileli ʻo e kuonga muʻá ki hono foha ko Solomoné: “Kapau te ke kumi [ki he ʻOtuá], te ke maʻu ia.”—1 Kalonikali 28:9.
Sai, ʻoku anga-fēfē leva, hono fakahā mai ʻe he ʻOtuá ʻa ia tonu? Te ke ʻamanekina ha fakaʻilonga—ha hoko ha meʻa ngali kehe atu mo natula ke fakamoʻoniʻi ai kiate koe ʻoku ʻi ai ha ʻOtua? Fakatatau ki ha fakaʻekeʻeke naʻe toki fai ʻa ia naʻe hiki ʻi he makasini Time, ʻoku laka hake ʻi he vahetolu ʻe ua ʻo e kau ʻAmeliká ʻoku nau tui ki he maná. Naʻe pehē foki ʻe he fakamatalá “ko e ngaahi siasi tupu vave taha ʻi ʻAmeliká ko e ngaahi fakatahaʻanga faka-Kalisimaá mo e faka-Penitekosí ʻa ē ko ʻenau lotú ʻoku takatakai holo pē ʻi he ‘ngaahi fakaʻilongá mo e ngaahi meʻa fakaofó.’”
ʻOku fiemaʻu moʻoni nai ha “ngaahi fakaʻilonga mo ha ngaahi meʻa fakaofo” kae toki tui ki he ʻOtuá? Naʻá ne ʻosi ngāueʻaki ʻe ia ʻa e ngaahi maná ʻi he ngaahi taimi ki muʻá. Ko e fakatātaá: Ko Saula ko ia ʻo Tāsusí, ʻa ē naʻá ne fakatangaʻi ʻa e kau muimui ʻo e ʻAlo ʻo e ʻOtuá, ʻa Sīsū Kalaisí, naʻá ne hokosia ha meʻa ngali kehe ʻi he hala ko ia mei Selusalema ki Tāmasikusí. ʻI he fetaulaki fakafokifā fakaemana ko eni mo e Sīsū kuo toetuʻú, ne iku atu ia ki hono fakaului ʻo Saulá. (Ngāue 9:1-22) Ko ia ko ha tokotaha naʻe fakatanga ki muʻa naʻe hoko ia ko e ʻaposetolo ko Paulá—ko e taha ʻo e kau taukapo tuʻu-ki-muʻa ʻo e lotu faka-Kalisitiané!
Ka ʻe langaʻi maʻu pē ʻe he maná ha tali fakahōifua pehē? ʻOku fakatuʻunga ʻa e tui moʻoni ki he ʻOtuá ʻi hano aʻusia ʻe ha taha ha faʻahinga mana?
[Fakatātā ʻi he peesi 3]
Ko e ʻAlo ʻo e ʻOtuá naʻe folofola fakaemana hifo kia Saula ʻo Tāsusí. Te ke ʻamanekina nai ha mana?