Ngaahi Pou Fakaʻilonga ʻi he Hala ki he Moʻuí

KAPAU ʻokú ke fononga atu ʻi ha hala pe ʻaluʻanga foʻou, te ke vakai ki ha ngaahi pou fakaʻilonga ko ha taʻofiʻanga? ʻIkai ʻaupito! ʻOku moʻoni te ke vakai kiate kinautolu ko ha tokoni ia te ne tokoniʻi koe mei haʻo hē mei he hala ʻoku taki atu ki he feituʻu ʻokú ke ʻalu ki aí.

Fēfē leva ʻa e fononga ʻi he hala ki he moʻuí? ʻOku lava ke lavameʻa hono fokotuʻutuʻú taʻekau ai ha ngaahi pou fakaʻilonga? Ko ha palōfita fuoloa ʻa e ʻOtuá naʻá ne ʻiloʻi ʻa e ngaahi ngataʻanga ʻo e faʻahinga ʻo e tangatá ʻi he fekauʻaki mo e meʻá ni. Naʻá ne pehē: “ʻOku ou ʻilo, ʻE ʻEIKI, ʻoku ʻikai ʻi he tangatá ke ne fili pē ʻe ia tonu hono ngaahi ʻaluʻangá; ʻoku ʻikai ʻi he tangatá ke ne fakapapauʻi hono ʻalunga ʻi he moʻuí.”​—Selemaia 10:​23, The New English Bible.

Ko fē leva, ʻe lava ke maʻu ai ʻa e tataki ʻoku fiemaʻú? Ko e matavai alafalalaʻanga ʻo e tataki peheé ko e Tokotaha-Fakatupu ʻo e tangatá, pea ko e ngaahi pou fakaʻilonga fakaefakatātaá ʻoku maʻu ia ʻi he Tohitapú. Naʻe pehē ʻe Sihova ʻi heʻene Folofolá: “ʻE fanongo ʻe ho telinga ki ha lea mei ho tuʻa, Ko eni ʻa e hala, fou ai; ka ai haʻo afe ki toʻomataʻu, pe ka ai haʻo afe ki toʻohema.”​—Aisea 30:21.

ʻIo, ʻoku ʻomai ʻe he Folofola ʻa e ʻOtuá ʻa e tataki alafalalaʻangá ki he tafaʻaki kotoa pē ʻo ʻetau moʻuí. (Aisea 48:17; 2 Timote 3:​16, 17) Kae kehe, ʻoku fakamamahí, ko e tokolahi taha ʻo e faʻahinga ʻo e tangatá ʻoku nau fononga ʻi he hala ki he moʻuí ʻo taʻekau ai ʻa e tataki fakaʻotuá. (Mātiu 7:13) Ka neongo ia, ko e ngaahi pou fakaʻilongá ʻoku tuʻumaʻu taʻeueʻi pē ʻi hono tuʻungá! Te ke tokanga kiate kinautolu ʻi hoʻo ʻaʻeva ʻi he hala ki he moʻuí?