“Ko Kimautolu Kau Katoliká ʻOku Lahi ʻa e Meʻa ke Mau Ako Meiate Kinautolú”

KO E vakai ko ʻeni fekauʻaki mo e Kau Fakamoʻoni ʻa Sihová naʻe fai ia ʻe ha faiako ʻi Bari, ʻĪtali, he lolotonga ʻo ʻene kalasi ʻi he akoʻanga-māʻolungá ki he hisitōlia ʻo e lotú. Naʻe tala ange ʻe he faiakó ki he kalasí te ne ngāueʻaki ha kāsete vitiō ko ha tokoni fakaefaiako. ʻI he fanongo ki he meʻá ni, ko e tokotaha ʻi he fānau akó, ko Roberto taʻu 18, naʻá ne fokotuʻu atu ke fakakau ʻi he fetalanoaʻakí ʻa e lotu ʻokú ne kau ki aí. Naʻá ne tuʻuaki ange kiate ia ʻa e foʻi vitiō ko e Jehovah’s Witnesses​—The Organization Behind the Name. Naʻá ne tali ʻa e tuʻuaki ʻa Roberto, pea ko e kalasí fakakātoa ko e fānau ako ʻe toko 30 nai naʻa nau sio ʻi he foʻi vitioó. “Naʻe maongo kiate kinautolu kotoa pē ʻa e fāʻūtahá, ko e fokotuʻutuʻu māú, pea mo e ʻofa loloto ʻoku maʻu ʻi he lotolotonga ʻo e Kau Fakamoʻoni ʻa Sihová,” ko e lea ia ʻa Roberto. “Naʻa nau toe ʻohovale ange he ʻilo ko e ngaahi tatau ʻe 40 miliona ʻo e Taua Leʻo pea mo e ngaahi tatau ʻe 36 miliona ʻo e Awake! ʻoku pulusi ʻi he māhina taki taha.”

“Naʻe ʻikai te u fakakaukau ʻoku mou fuʻu fokotuʻutuʻu maau pehē,” ko e fakaongoongolelei ia ʻa e kaungāako ʻe niʻihi ʻo Roberto ʻi he hili ʻenau sio ʻi he foʻi vitioó. ʻI he fekauʻaki mo e Kau Fakamoʻoni ʻa Sihová, naʻe pehē ʻe he faiakó ki he kalasí: “Fakatokangaʻi ʻa e founga ʻoku ueʻi ai ʻe heʻenau tuí kinautolu ke nau hoko ai ʻo mātuʻaki fāʻūtaha mo fokotuʻutuʻu māú. Ko kimautolu kau Katoliká ʻoku lahi ʻa e meʻa ke mau ako meiate kinautolú.” Ko e foʻi vitioó pea mo e fetalanoaʻaki ʻa e kalasí he hili iá naʻá ne fakatupunga lahi ha mahino lelei ange fekauʻaki mo e Kau Fakamoʻoni ʻa Sihová.