“ʻAtu Ako ki ha Tamasiʻi”
KE TUPU ʻa e ngoué ʻoku fiemaʻu ʻa e meʻa lahi ange ia ʻi hono fakamovete holo pē ʻa e tenga ʻe niʻihi ʻi he kelekelé pea foki atu ʻi ha ngaahi māhina siʻi ʻamui ʻo toli. ʻOku kaunga ki ai ʻa e ngāue lahi ʻi hono teuteu ʻa e kelekelé, tō ʻa e ngaahi tengá, pea fuʻifuʻi mo tokangaʻi ʻa e ʻakaú koeʻuhí ke nau lava ʻo tupu ʻo matuʻotuʻa.
ʻOku lava ke fakatātaaʻi lelei ʻa e ngāue ko ʻení ki he moʻoni ʻo e Palovepi 22:6, ʻa ia ʻoku pehē: “ʻAtu ako ki ha tamasiʻi, ʻo tāu mo hono ʻalunga, talaatu ʻo ka ne ka motuʻa ʻe ʻikai te ne hiki mei ai.” Ko e moʻoni, ko e akoʻi fakaemātuʻá ko ha meʻa lahi ia ki he lavameʻa ʻo hono ʻohake ʻo e kiʻi tamasiʻí.
Kae kehe, ʻi he māmani fakangofua tavale ʻo e ʻaho ní, ʻoku taʻetokangaʻi ai ʻe he ngaahi mātuʻa tokolahi ʻa e akonaki ko ʻení. ʻI he taimi ʻoku nau muimui ai ki he poto anga-maheni ko ia kuo pau ke ako ʻa e fānaú ke fakaleleiʻi ʻa e ngaahi palopalemá ʻiate kinautolu peé, ʻoku faʻa tuku pē ki heʻenau fānaú ke nau fekuki pē ʻiate kinautolu. Ko ha ʻalunga pehē ʻoku hoko ai ʻo laveangofua ʻa e kau talavoú ʻi he tākiekina fakatuʻutāmaki ʻa e faʻahinga tāutaha ʻoku anga-fulikivanu mo ngāue taʻetotonu.—Palovepi 13:20.
He lelei lahi ange ē ki he ngaahi mātuʻá ke nau fakahūhū ʻa e ngaahi tefitoʻi moʻoni faka-Kalisitiané ki heʻenau fānaú ʻo fakafou ʻi he akoʻi fakaʻotua mei he kei taʻu īkí! Ko e taʻu fē? “Mei he kei valevale,” ko e lea ia ʻa e ʻapositolo ko Paulá. Ko e meʻa ia naʻe hoko ki he kiʻi tangata talavou ko Tīmoté. Ko ʻene faʻeé, ko ʻIunisi, pea mo ʻene kui fefiné ko Loisi naʻá na fakahūhū ʻa e “Tohitapu” kia Tīmote koeʻuhí ke ne “ako” pea naʻe “fakamahino atu.” Ko e olá? Ko e akoʻi peheé naʻe hoko ia ko ha ngafa mātuʻaki mahuʻinga ʻi hono ʻai ia ‘ke fakapoto ki he fakamoʻuí.’—2 Timote 1:5; 3:14, 15.
ʻOku pehē pē ʻi he ʻahó ni, ko e ngaahi mātuʻa ʻoku ʻikai te nau “fiu ʻi he failelei” te nau utu ʻa e ngaahi pale lahi kapau ʻe ʻikai te nau “vaivai.” (Kaletia 6:9) ʻOku pehē ʻe he tuʻi poto ko Solomoné: “ʻE matuʻaki tomeʻe ʻa e tamai ʻa ha tangata faitotonu.”—Palovepi 23:24.