“Naʻe Lava Ke u Ongoʻi ʻa e ʻAtimosifia ʻo e Melinó”
KO HA tangata lea faka-Siamane naʻá ne ʻalu ki ha fakataha-lahi naʻe fokotuʻutuʻu ʻe he Kau Fakamoʻoni ʻa Sihová koeʻuhí ke ne “matakiʻi” ʻa e Kau Fakamoʻoní. Ko e hā hono ʻuhingá? Ko ʻene taumuʻá ke “fakaeʻa ʻa e lotu mavahe ko ʻení pea fakahaofi hono ngaahi kaumeʻá mei he ʻalu heé.” ʻI he hili ʻene maʻu ʻa e fakataha-lahí, naʻá ne tohi ʻa e tohi hoko haké ki hono ngaahi kaumeʻá:
“ʻI he taimi naʻá ku ofi atu ai ki he feituʻu faiʻanga fakataha-lahí, naʻá ku fifili pe ko e feituʻu tonú ʻeni. Naʻe ʻikai fai ha sio ki ha taha, pea ʻikai ha veve pe ngaahi ngeʻesi kapa pia ʻi he falikí. ʻI heʻeku ofi atú, naʻá ku sio ai ki ha ongo tangata ʻi he hūʻanga ki he sitētiumé. Naʻá na fakafeʻiloaki mai kiate au peá na fakaʻatā au ke u hū ki loto.
“Naʻá ku ʻamanekina te u fanongo ki ha longoaʻa mei he laui afe ʻo kinautolu naʻa nau ʻi aí, ka naʻe fuʻu lōngonoa ʻaupito. ‘Sai,’ naʻá ku fakakaukau, ‘mahalo pē ʻoku ʻi ai ha kakai tokosiʻi ʻoku nau movete takai holo ʻi he kotoa ʻo e feituʻú.’
“ʻI he taimi naʻá ku hū atu aí, naʻe maʻunimā leva ʻeku fakakaukaú ʻe ha tulama naʻe fakatātaaʻi ʻi he peletifōmú. Ki mui pē aí, naʻá ku fakatokangaʻi ai naʻe fonu ʻaupito ʻa e sitētiumé ʻi he laui afe ʻo e kau fanongo tokanga. Naʻe lava ke u ongoʻi ʻa e ʻatimosifia ʻo e melinó. Ko e meʻa naʻá ku fanongo aí, sio aí, mo ongoʻi he lolotonga ʻo e toenga ʻo e fakataha-lahí naʻe maongo loloto kiate au.
“ʻI he feohi fakataha mo e Kau Fakamoʻoní, naʻe ʻikai te u fai ha tokoni ka ko hono fakatokangaʻi ʻenau mata fiefiá pea mo e fakahāhā ʻo e ʻofá. Fakafokifā, naʻe ʻikai lava ke u lōmia ʻa e fakakaukau, ‘Ko e kakai moʻoni ʻeni ʻa e ʻOtuá!’”
ʻI he ʻikai ko hono “fakahaofi hono ngaahi kaumeʻá mei he ʻalu heé,” naʻe kole ange ʻa e kiʻi tangatá kiate kinautolu ke nau ako ʻa e Tohitapú mo ia. Ko hono olá? ʻI he ʻahó ni, ko ha tokotaha mātuʻa Kalisitiane ia. Ko ia mo hono fāmilí ʻoku nau longomoʻui ʻi he taha ʻo e ngaahi fakatahaʻanga ʻi Zug, Suisalani.