Fakahīkihikiʻi ʻe he Kau Maʻu Mafaí ʻa e Kau Fakamoʻoní
ʻI CÁDIZ, Sipeini, ko ha kolo taulanga naʻe tuʻu ʻi he kilomita nai ʻe 500 ʻi he tonga-hihifo ʻo Madrid, ko e pule kolo ko Doña Teófila Martínez, naʻá ne foaki ha maka fakamanatu (fakatātā ʻi ʻolungá) ki he Kau Fakamoʻoni ʻa Sihová. ʻOku pehē ai: “Ko e holo fakakolo ʻo Cádiz ki he Kau Fakamoʻoni ʻa Sihová ʻi he houngaʻia ki heʻenau fengāueʻaki fakataha mo e ngaahi feinga maʻá e koló ni.” Ko e hā naʻe fai ʻe he Kau Fakamoʻoní naʻa nau maʻu ai ʻa e fakalāngilangi ko ʻení?
Naʻe foaki ia ʻi hono ʻiloʻi ʻa e ngāue ʻa e Kau Fakamoʻoní naʻe fai ki hono toe fakaleleiʻi ʻa e konga ʻo e sitētiume fakafeituʻu ʻo e koló. Laka hake ʻi he ngaahi fakaʻosinga ʻo e uiké ʻe niʻihi, ko e lauingeau ʻo e Kau Fakamoʻoní naʻa nau pole ke tokoni ki hono fakafoʻou ʻa e ngaahi falemālōlō ʻi lalo ʻo e sitētiume ʻakapulu ʻo Carranza. He taimi ní, ko kinautolu ʻoku nau ngāueʻaki ʻa e sitētiumé ʻoku ʻaonga kiate kinautolu ʻa e ngaahi paipa, fakalelei fakapalama, mo e faliki kuo fokotuʻú.
ʻI ha taimi fuoloa, kuo fiefia ʻa e Kau Fakamoʻoni ʻa Sihová ʻi he vahaʻangatae lelei mo e kolo ko Cádiz. ʻI he taʻu kotoa pē, ʻoku anga-ʻofa ʻa e kōmiti fakakoló ke fakafaingamālieʻi ʻa e Sitētiume Carranza ki he Kau Fakamoʻoní ki heʻenau fakataha-lahi fakavahe fakataʻú. Ko ia ai, ʻoku fiefia ʻa e Kau Fakamoʻoní ke fai ʻa e meʻa te nau lavá ke tokoni ki hono tauhi ʻa e sitētiumé ʻi hono tuʻunga kuo fakaleleiʻi leleí.
Kae kehe, tānaki atu ki he ngaahi ngāue fakaesino ʻi he taimi ki he taimí, ʻoku ʻaʻahi maʻu pē ʻa e Kau Fakamoʻoni ʻa Sihová ki he ngaahi kaungāʻapi ʻi he koló ke poupouʻi ʻa e kakaí ʻi ha toe founga ʻe taha. ʻOku nau fanongonongo ʻa e “ongoongo lelei” ʻo e Puleʻanga ʻo e ʻOtuá. Ko hono moʻoní, ʻoku ʻikai te nau kau ki heʻenau ngāue fakafaifekau ki he kakaí koeʻuhí ke maʻu ha fakahīkihiki mei he tangatá. ʻOku nau fai ia ʻi he talangofua ki he fekau ʻa Sīsū ke malangaʻi ʻa e “ongoongolelei ko eni ʻo e Puleʻanga” pea ke “ngaohi ʻa e ngāhi kakai kotoa pe ko [ʻene] kau ako.” (Mātiu 24:14; 28:19) ʻI he founga ko ʻení, ʻoku ʻamanekina ʻe he Kau Fakamoʻoni ʻa Sihová ke ngāue ʻi he koló ʻaki hono akoʻi ʻa e kakaí ki he “hala ʻo e faitotonu.”—Palovepi 12:28.