Fakamālohí—Vavé Ni ke Ngata ʻo Taʻengata!
“Fakatuʻutāmaki ki he Puleʻangá ʻa e Fakamālohí”—The New York Times, ʻIunaite Setete.
“Fakamālohí ʻi ʻApi”—O Globo, Pelēsila.
“Tolofi ʻe he Fakamālohí ʻa e Kakai Fefine ʻo e Māmaní”—The Globe and Mail, Kānata.
KO E ngaahi ʻuluʻi ongoongo mei he ngaahi nusipepa ʻi ʻAmelika Tokelau mo ʻAmelika Tongá ʻokú ne fakatātaaʻi ha fakahohaʻa ʻi māmani lahi. Hangē ko ia ko hono ʻomai ki muí ni ʻe he Kautaha Moʻui ʻa Māmaní, “ko e fakamālohí ʻi hono ngaahi tuʻungá kotoa pē kuo tupulaki fakaʻulia ia ʻi he ngaahi hongofuluʻi taʻu ki mui ní.”
Lāulea ki he ngaahi fika fakatupu-fakakaukau ʻe niʻihi:
Tāmate tangatá. ʻI ʻAmelika Latina pea mo e ʻOtu Kalipiané, ʻoku fetaulaki ai ʻa e kakai ʻe toko 1,250 nai mo ha mate fakamālohi ʻi he ʻaho taki taha. Ko hono olá, “ʻi he vaeua ʻo e ngaahi fonua ʻo e feituʻú, ko e fakapoó ko ha tupuʻanga tefito ia hono ua ʻo e maté ʻi he kau talavou taʻu 15-24.”
Fakamālohiʻi ʻo e fānaú. Ko e ngaohikoviʻi fakaesino, fakaefehokotaki fakasino, mo fakaeongo ʻo e fānaú ko e ngaahi palopalema ia ʻi he māmaní kotoa. Hangē ko ʻení, “ko e ngaahi savea ʻo e kakai lalahi ʻi he ngaahi fonua fakalakalaka ʻe niʻihi ʻoku nau pehē ko e 10%–15% ʻo e fānaú ko e kau maʻukovia ia ʻi he ngaohikoviʻi fakaefehokotaki fakasinó—ko e tokolahi taha ʻo kinautolú ko e tamaiki fefine.”
Fakamālohiʻi ʻo e kakai fefiné. ʻI he hili ʻa hono fakatotoloʻi ʻa e ngaohikoviʻi ʻo e ngaahi totonu ʻa e tangatá naʻe fakahoko ʻi māmani lahi ʻi he 1997, naʻe fakaʻosiʻaki ʻe he kau fakatotoló ʻo pehē “ko e fakamālohi ʻi ʻapí kuo hoko ia ko e taha ʻo e ngaahi tupungaʻanga tefito ʻo hono fakalaveaʻi ʻo e kakai fefiné ʻi he meimei fonua kotoa pē ʻi he māmaní.” (Human Rights Watch World Report 1998) Ko e fakamālohi ʻi ʻapí, kuo hoko ia ko ha palopalema mafolalahia kae siʻi hono līpōtí, ʻoku ui ia he taimí ni “ko e faingataʻa taʻeleaʻaki ia ʻo e senituli hono 20.”—The Globe and Mail, Kānata.
Ko e māmaní naʻe tatau pē, ʻi he “opeope . . . ʻa e fakamalohi” he ngaahi ʻaho ʻo Noá. (Senesi 6:9-12) Ka naʻe tauhi pē ʻe Sihova ko e ʻOtuá ʻa e “[tokotaha] malangaʻaki ʻa e maʻoniʻoni” mo hono fāmilí ke moʻui “ʻi heʻene ʻomi ʻa e Lōmaki ki he maama ʻo e kau fakaʻotuamate.” ʻE fakahoko ʻe he ʻOtuá ʻa e ngāue tatau ʻi hotau ʻahó ni. Te ne fakahaofi ʻa e “kakai lotumoʻoni” ʻi he taimi te ne toʻo atu ai ʻa e fakamālohí mo e fulikivanú pea ʻai ʻa e foʻi māmani ko ʻení ko ha palataisi ʻi heʻene māmani foʻou kuo talaʻofaʻaki maí. (2 Pita 2:4-9; 3:11-13) ʻIkai ʻokú ke loto-fiefia ke ʻilo ko e fakamālohí ʻe vavé ni ke ngata ʻo taʻengata?