Meʻa ʻOku Lelei Ange Ia ʻi he Ngaahi Meʻa Teuteú
ʻI HE hili ʻa e lave ki he “ngaahi tokoni fakatuʻasino” ʻoku ngāueʻaki ʻe he kau fefiné ko e fakalahi ki honau talavoú, naʻe faleʻi mai ʻe he ʻapositolo ko Pitá: “Ka, ko ho fakaʻofoʻofá ʻoku totonu ke tupu ia meiate koe tonu ʻi lotó, ʻa e fakaʻofoʻofa taʻengata ʻo ha laumālie anga-malū mo nonga, ʻa ia ʻoku mahuʻinga lahi taha ʻi he vakai mai ʻa e ʻOtuá.”—1 Pita 3:3, 4, Today’s English Version.
Ko e meʻa fakatupu mahuʻingaʻiá, ʻi he taimi naʻe tohi ai ʻa e ʻapositoló ʻo fekauʻaki mo e teuteu fakatuʻasino peheé, naʻá ne ngāueʻaki ha faʻunga ʻo e foʻi lea faka-Kalisi ko e koʹsmos, ʻa ia ko e toe tefito ia ʻo e foʻi lea faka-Pilitānia ko e “cosmetic,” ʻoku ʻuhingá “ko hono ʻai ke talavou tau[tautefito] ki he lanu ʻo e kili ʻo e matá.” Naʻe fokotuʻu ʻe Pita hano fakataputapui ʻa e kau fefine Kalisitiané fekauʻaki mo e ngāueʻaki ʻo e meʻa vali-matá pea mo e ngaahi tokoni ki he talavou meimei tatau kehé? ʻOku ʻikai ha meʻa pehē ia ʻi he Folofola ʻa e ʻOtuá ʻokú ne fokotuʻu mai ʻa e meʻa ko iá. Ka, ʻokú ne fakaʻatā ʻa e fili fakafoʻituitui ʻi he meʻá ni, ko ia ʻe lava ke ʻamanekina ha tuʻunga ʻo e kehekehe ʻi he manakó.
Kae kehe, kapau ʻoku fuʻu hulu ʻa hono ʻai ʻo e meʻa vali-matá, pe ko hono fai ʻo aʻu ki ha tuʻunga ʻoku fakahohaʻasi ai ha niʻihi kehe tokolahi, ko e hā ʻa e pōpoaki ʻokú ne fakahoko maí? ʻIkai ko e anga-fefeka, loto-ʻoho, fie ngali hā fakaʻofoʻofa, fiehā, pe faʻifaʻiteliha? Ko e moʻoni, ʻoku lava ke ne fakamaʻamaʻaʻi ai ha fōtunga ʻo ha fefine, mahalo ko hano ʻoatu ai ha fakamatalahalaʻi ʻo e ʻulungāngá.—Fakafehoanaki mo Isikeli 23:36-42.
ʻI hono ʻilo ʻo e meʻá ni, ko ha fefine ʻokú ne “lavutu ke tauhi ki he ʻOtua” te ne feinga, kapau te ne fili ke ngāueʻaki ʻa e meʻa teuteú, ke ʻai hono fofongá ke hā mei ai ʻa e fakaʻilonga ʻo e anga-fakamaʻumaʻu, angalelei, anga-ʻofa, mo e anga-fakanānā. Ko e ngaahi ʻulungaanga peheé ʻe tānaki atu ia ki hono ngeiá mo hono fakaʻofoʻofá. Ko e moʻoni, pe ʻokú ne fili ke ngāueʻaki ʻa e meʻa teuteú pe ʻikai, te ne fakahāhā ha ngeia mo e fakaʻofoʻofa ʻi loto. ʻE tapua mai ai ʻene ʻiloʻi, hangē ko ia naʻe fakahuʻuhuʻu ki ai ʻa e ngaahi lea ʻa Pita naʻe hiki ʻi ʻolungá, ʻoku ʻi ai ʻa e meʻa ʻoku lelei ange ia ʻi he ngaahi meʻa teuteú.—1 Timote 2:9, 10.