“Ka Mole mei he Masima Hono Kona”

KUO fai ʻa e ngaahi tau fekauʻaki mo ia. Kuo faʻa ngāueʻaki ia ko ha fakafetongi koloa. ʻI Siaina ʻo e kuonga muʻá naʻe fika ua hake ia ki he mahuʻinga ʻo e koulá. ʻIo, ko e māsimá kuo vakai fuoloa ki ai ʻa e faʻahinga ʻo e tangatá ko ha koloa naʻe fakamahuʻingaʻi lahi. ʻOku aʻu mai ki he ʻahó ni, ʻoku fakakau atu ki ai ʻa e faitoʻo mo e ngaahi meʻa tāmate siemú, pea ʻoku ngāueʻaki takatakai ia ʻi he kolopé ko ha meʻa fakaifo mo e meʻa fakatolonga.

ʻI he vakai atu ki he ngaahi anga fakamānako mo e ngāueʻaki lahi ʻo e māsimá, ʻoku ʻikai ha ofo ʻi hono ngāueʻaki fakaefakatātā ia ʻi he Tohitapú. Ko e fakatātaá, ko e Lao ʻa Mōsesé, naʻe fiemaʻu ai ko ha meʻa pē ʻe foaki ʻi he ʻōlitá kia Sihova naʻe pau ke fakamāsima. (Livitiko 2:13) Naʻe ʻikai ke fai ʻeni ia ke fakaleleiʻi ai ʻa e ifo ʻo e ngaahi feilaulaú, ka ʻoku hangehangē koeʻuhi naʻe fakafofongaʻi ʻe he māsimá ʻa e hao mei he ʻauhá pe ʻauʻaungá.

ʻI heʻene Malanga ʻiloa ʻi he Moʻungá, naʻe lea ai ʻa Sīsū Kalaisi ki hono kau muimuí: “Ko kimoutolu ko e masima ʻo e fonua.” (Mātiu 5:13) Ka ʻi he fakamatala ko ʻení, naʻe fakahaaʻi ai ʻe Sīsū ko ʻenau malanga ki he niʻihi kehé fekauʻaki mo e Puleʻanga ʻo e ʻOtuá ʻe ala hoko ia ko ha tākiekina fakatolonga, pe fakahaofi-moʻui, ki heʻenau kau fanongó. Ko e moʻoni, ko e faʻahinga ʻoku nau ngāueʻaki ʻa e ngaahi lea ʻa Sīsuú ʻe maluʻi kinautolu mei he hōloa fakaeʻulungaanga mo e fakalaumālié ʻi he ngaahi kolo ko ia ʻoku nau nofo mo ngāue aí.​—1 Pita 4:​1-3.

Kae kehe, naʻe hoko atu ʻa Sīsū ke ʻoatu ha fakatokanga: “Pea ka mole mei he masima hono kona, . . . ʻoku ʻikai kei ʻaonga ki ha meʻa, ka ke laku pe kituʻa ke molo ai ʻa e kakai.” ʻI hono fakamatalaʻi ʻa e meʻá ni, naʻe pehē ai ʻe he mataotao Tohitapu ko Albert Barnes, ko e māsima ko ia naʻe ʻiloʻi ʻe Sīsū mo ʻene kau ʻapositoló “naʻe taʻemaʻa, fio vesitapolo pea kelekelea.” Ko ia, kapau kuo mole mei he māsimá hono koná, ʻe kei toe nai “ha ngaahi meʻa kelekelea lahi ʻaupito.” “ʻI he meʻa ko ʻení,” ko e fakatokangaʻi ia ʻe Barnes, “naʻe ʻikai ʻaonga ki ha meʻa ka . . . ke tuku pē ʻi he halá, pe ʻaluʻangá, ʻo hangē ko ia ko ʻetau ngāueʻaki ʻa e makamaká.”

ʻI he tokanga ki he fakatokanga ko ʻení, ʻoku totonu ke tokanga ʻa e kau Kalisitiané ke ʻoua ʻe taʻofi ʻenau faifakamoʻoni ki he kakaí pe tō ki he ngaahi sīpinga fakaʻotuamate ʻo e ʻulungāngá. Ka ʻikai, te nau fakaʻaʻau atu ke kovi ange fakalaumālie pea lava ke hoko ʻo taʻeʻaonga, hangē ko e ‘mole mei he masimá hono koná.’