Naʻá Na “Manavahē ki he ʻOtua Moʻoní”
ʻI HE lolotonga ʻa e nofo pōpula ʻa e kau ʻIsilelí ʻi ʻIsipité, naʻe tuku ki ha tuʻunga faingataʻa ʻa e ongo māʻuli Hepelū ko Sifila mo Puá. ʻI he feinga ke taʻotaʻofi ʻa e vave ʻa e tupu tokolahi ʻa e kau mulí, naʻe fekauʻi ʻe Felo ʻa e ongo fefine ko ʻení: “ʻI hoʻomo tokoniʻi ʻa e kau fefine Hepeluú ke fāʻelé . . . , kapau ko ha foha ia, kuo pau foki ke mo tāmateʻi ia.”—Ekisoto 1:15, 16, NW.
Ko Sifila mo Puá naʻá na “manavahē ki he ʻOtua moʻoní,” ko ia naʻá na loto-toʻa pea “ʻikai te na fai ʻo hangē ko ia naʻe leaʻaki ʻe he tuʻi ʻo ʻIsipité kiate kinauá.” Ka, naʻá na fakahaofi ʻa e fanga kiʻi valevale tangatá, neongo ko ʻena tuʻumaʻu loto-toʻa ko ʻení naʻe mei lava ke ne ʻai ai kinaua ki ha fakatuʻutāmaki. Ko Sihová “naʻá ne failelei ki he ongo māʻulí,” pea naʻá ne fakapaleʻi kinaua ʻi heʻena ngaahi ngāue fakahaofi moʻuí.—Ekisoto 1:17-21, NW.
ʻOku fakamamafaʻi ʻe he fakamatala ko ʻení ʻa e hōifua ʻa Sihova ki he faʻahinga ʻoku nau tauhi kiate iá. Naʻe mei malava pē ke ne ʻafioʻi ʻa e meʻa naʻe fai ʻe Sifila mo Puá, neongo ʻa e loto-toʻá, ko hano pouaki pē ʻa e lelei ʻa e faʻahinga ʻo e tangatá. He ko ē, heʻikai ha fefine fakapotopoto te ne fakapoongi ha fānau valevalé! Neongo ia, ʻoku ʻikai ha veiveiua ʻoku ʻafioʻi ʻe Sihova ʻa e moʻoniʻi meʻa ko ia ko e faʻahinga ʻe niʻihi ʻo e tangatá koeʻuhi ko e manavahē ki he tangatá, kuo nau fai ʻa e ngaahi ngāue mātuʻaki kovi ʻaupito. Naʻá ne ʻafioʻi ko e ongo māʻuli ko ʻení naʻe ʻikai ngata pē ʻi hono ueʻi kinaua ʻe he anga-ʻofa fakaetangatá kae toe pehē foki ki he manavahē mo e līʻoa fakaʻotuá.
Ko ha fakamālō ē ka ko kitautolu ke tau tauhi ki ha ʻOtua ʻokú ne ʻafioʻi ʻa ʻetau ngaahi ngāue anga-tonú! Ko e moʻoni, mahalo pē ʻoku ʻikai ha taha ʻo kitautolu kuó ne fehangahangai mo e ʻahiʻahiʻi ʻo e tuí ʻa ia naʻe tenge kia Sifila mo Puá. Ka, ʻi he taimi ʻoku tau tuʻumaʻu ai ki he meʻa ʻoku totonú—pe ʻi he ʻapiakó, ʻi heʻetau feituʻu ngāueʻangá, pe ʻi ha feituʻu kehe pē—ʻoku ʻikai ke fakamaʻamaʻaʻi ʻe Sihova ʻetau ʻofa mateakí. ʻI hono kehé, ʻokú ne “hanga ʻo totongi kiate kinautolu ʻoku kumi hākili kiate ia.” (Hepelu 11:6) ʻIo, “talaʻehai ʻoku fai taʻetotonu ʻa e ʻOtua ke ne fakangaloʻi hoʻomou ngaue, mo e ʻofa ki hono huafa naʻe ha ʻiate kimoutolu ʻi hoʻomou tokoni ki he kakai lotu, ʻa ia foki ʻoku mou kei fai.”—Hepelu 6:10.