ʻAi ke Mafamafatatau ʻa e Ngāué mo e Taimi Mālōloó
“ʻOKU hangē ha teunga fakaʻofoʻofá ʻa e taimi mālōloó, ka ʻe ʻikai ke feʻunga ia ke tui maʻu pē.” ʻAki ʻa e ngaahi lea ko ʻení, ʻoku fakatātaaʻi lelei ai ʻe ha tokotaha-tohi ʻoku ʻikai ʻiloʻi hono hingoá ʻa e mahuʻinga ʻo e taimi mālōloó. Kae kehe, ʻokú ne fakahā ʻoku totonu ke hoko ia ʻo mafamafatatau mo e ngāue ʻoku ola leleí.
Naʻe toe leaʻaki ʻa e meʻa ko ʻení ʻe he tokotaha-tohi Tohitapu fakamānavaʻi ko Solomoné. Naʻe fakapapauʻi mai ʻe he tuʻi poto ko ʻení ʻa e ongo tuʻunga tōtuʻa ʻe ua ke fakaʻehiʻehi mei ai. ʻUluakí, naʻá ne pehē: “Ko e vale ʻoku ne fehulunaki nima, ʻo kai hono kakano oʻona.” (Koheleti 4:5) ʻIo, ʻe lava ke ʻomai ʻe he fakapikopikó ha masiva ki ha taha. Ko hono nunuʻá, ʻoku lava ke fakatuʻutāmaki ia ki he moʻui lelei ʻa e tokotaha fakapikopikó, naʻa mo ʻene moʻuí. ʻI he tafaʻaki ʻe tahá, ʻoku ʻi ai ʻa e niʻihi kuo nau feilaulauʻi ʻa e meʻa kotoa pē koeʻuhi ko e ngāue mālohí. Naʻe fakamatalaʻi ʻe Solomone ʻenau ngāue mālohi taʻetukú ko e “muna mo ia foki, mo e kai matangi.”—Koheleti 4:4.
ʻI he ʻuhinga lelei, naʻe fakaongoongoleleiʻi ʻe Solomone ʻa e mafamafatataú: “ʻOku lelei hake ha falukunga ʻe taha mo e fiemalie ʻi ha falukunga ʻe ua [ʻoku] ō mo e fakaongosia mo e kai matangi.” (Koheleti 4:6) ʻOku totonu ki ha tokotaha ke ne ‘fafanga ʻaki hono lotó ʻa e lelei ʻoku maʻu ʻi heʻene ngaué’—ʻa ia, ʻoku totonu ke ne faʻa maʻu ha taimi ke ne fiefia ai ʻi he meʻa kuó ne ngāue ki aí. (Koheleti 2:24) Pea ʻoku totonu ke ʻi ai ʻa e ngaahi meʻa kehe ʻi he moʻuí tuku kehe ʻa e ngāue fakamāmaní. ʻOku fiemaʻu nai ki hotau fāmilí ha konga ʻo hotau taimí. Naʻe fakamamafaʻi ʻe Solomone ko hotau ngafa tefitó, ʻoku ʻikai ko e ngāue fakamāmaní, ka ko e ngāue ki he ʻOtuá. (Koheleti 12:13) ʻOkú ke ʻi he lotolotonga ʻo e faʻahinga ko ia ʻoku nau fiefia ʻi he vakai mafamafatatau ki he ngāué?