ʻI he Taimi ‘Naʻe Tokai Mai Ai Kiate Kimautolu ʻa e Matangí’
ʻI hono fakamatalaʻi ʻa e meʻa naʻe hokosia moʻoni ʻi he moʻui ʻa e kau ākonga ʻa Sīsuú ʻi heʻenau fāinga ke kolosi ʻi he Tahi ʻo Kālelí ʻi ha vaka, ʻoku pehē ʻe he tokotaha tohi Kōsipeli ko Maʻaké naʻa “nau faingataʻaʻia ʻi heʻenau aʻalo, he naʻe tokai ʻa e matangi.” ʻI he kei ʻi ʻutá, naʻe sio atu ai ʻa Sīsū ki heʻenau faingataʻaʻiá peá ne luelue fakaemana atu ʻi he tahí ke aʻu kiate kinautolu. ʻI he taimi naʻe heka ia ki he vaka kiate kinautolu, naʻe talolo ʻa e matangi.—Maake 6:48-51.
Naʻe fakamatala ʻe he tokotaha-tohi Tohitapu tatau ʻo pehē ʻi ha taimi ki muʻa atu, naʻe “tō mai ha fuʻu ʻahiohio.” Ko ia ai, naʻe hanga ʻe Sīsū, ʻo “lolomi ʻa e matangi, . . . Pea tālolo ʻa e matangi, pea hoko ha tofu lahi.”—Maake 4:37-39.
Neongo ʻoku ʻikai ke tau maʻu he ʻahó ni ha monū ke sio tonu ʻi ha ngaahi meʻa fakaofo pehē, ʻoku lava ke tau ako ha meʻa lahi meiate kinautolu. ʻI he tuʻunga ko e faʻahinga ʻo e tangata taʻehaohaoa ʻoku moʻui ʻi he ngaahi taimi fakatuʻutāmakí, ʻoku ʻikai ke tau hao mei he ngaahi matangi ʻo e faingataʻaʻiá. (2 Timote 3:1-5) Ko hono moʻoní, ʻi he taimi lahi ʻoku tau ongoʻi nai ko e mamahí ʻoku hoko ia fakataha mo e ngaahi ʻahiʻahi fakafoʻituitui ʻo aʻu ki ha ʻahiohio lahi. Ka ʻoku ala maʻu ha fakatauʻatāina! ʻOku fakaaʻu mai ʻe Sīsū ʻa e fakaafé: “Haʻu kiate au, ʻa kimoutolu kotoa pe ʻoku fakaongosia mo māfasia, pea te u fakamālōlō kimoutolu.”—Mātiu 11:28.
ʻI he taimi ʻoku hā mai ai ʻoku ‘tokai mai kiate kitautolu ʻa e matangí,’ ʻoku malava ke tau hokosia ʻa e loto “nonga.” Anga-fēfē? ʻAki ʻa e falala ki he ngaahi talaʻofa taʻealatuku ʻa Sihova ko e ʻOtuá.—Fakafehoanaki mo Aisea 55:9-11 (Isaia, PM); Filipai 4:5-7.