ʻOku Lava Ke Ke ʻIloʻi ʻa e Kahaʻú!
ʻOku fakakaukau fakamātoato ʻa e tokolahi taha ʻo e kakaí ʻo fekauʻaki mo e kahaʻú. ʻOku nau saiʻia ke palani, ke ʻinivesi fakapotopoto, pea ke ongoʻi malu. Ka ʻoku toe ʻi ai ha founga ke fakapapauʻi ai fekauʻaki mo e meʻa ʻoku tukutauhi mai ʻi he ʻapongipongí?
ʻI HA feinga ke ʻiloʻi ʻa e meʻa ʻoku tukutauhi mai ʻi he kahaʻú, kuo ʻahiʻahiʻi ʻe he tangatá ʻa e ngaahi meʻa kehekehe kotoa. Ko e kau faisaienisi sōsiale ʻoku ui ko e kau faifekumi ki he kahaʻú ʻoku nau ʻanalaiso ʻa e ngaahi fakalakalaka lolotongá pea fai ʻenau ngaahi toka fakamatalá makatuʻunga ʻi he ngaahi meʻá ni. ʻOku fai ʻa e meʻa tatau ʻe he kau ʻekonōmiká ʻi he malaʻe ʻonautolú. Ko e kau ʻasitalolosiá mo e tongafisí ʻoku nau hanga ki he ngaahi fakatātā ʻo e tuʻuʻanga palanité, ko e ngaahi foʻi pulu kilisitalá, pea mo e meʻa fakafaʻahikehé, pea ʻoku nau maʻu ha fuʻu kau muimui tokolahi. Ko e fakatātaá, ko e faiʻasitalolosia Falanisē ko Nositalatamusí ʻoku hokohoko atu ʻa ʻene manakoá, neongo kuó ne ʻosi mate ʻi ha laui senituli.
Ko e kotoa ʻo e kau palōfita lau pē ko ení kuo fakamoʻoniʻi ʻenau mātuʻaki taʻefalalaʻanga mo fakalotomamahí. Ko e hā hono ʻuhingá? Koeʻuhi ʻoku nau liʻaki ʻa Sihova ko e ʻOtuá mo ʻene Folofolá, ʻa e Tohitapú. ʻI he ʻuhinga ko ení ʻoku ʻikai ai te nau lava ke tali ʻa e ngaahi fehuʻi tefito hangē ko ení: ‘Ko e hā ʻoku lava ai ke u fakapapauʻi ko e ngaahi meʻa naʻe tomuʻa tala ʻi he Tohitapú kuo pau ke hoko? ʻOku anga-fēfē ʻenau feʻungamālie mo e taumuʻa ʻa e ʻOtuá ki he faʻahinga ʻo e tangatá? ʻOku lava fēfē ke maʻu ʻaonga ʻa hoku fāmilí pea mo au mei he ngaahi kikité ni?’ ʻOku tali ʻe he Tohitapú ʻa e ngaahi fehuʻi ko ení.
ʻOku toe māʻolunga ange ʻa e kikite ʻa e Tohitapú ʻi he ngaahi founga lahi kehe. ʻI he ʻikai tatau mo e ngaahi tala ki muʻa fakaʻasitalolosiá, ʻoku fakaʻatā ai ki ha fili tauʻatāina fakafoʻituitui. Ko ia ai, ʻoku ʻikai ke maʻukovia ai ha taha ʻe he tomuʻa fakatufakangaʻí. (Teutalonome 30:19) Ko e ngaahi tohi hangē ko ia ʻa Nositalatamusí ʻoku masiva fakaeʻulungaanga, pea ʻoku nau fakafonu ʻaki ʻa e masiva ko ení ʻa e meʻa taʻemahino mo fakatupunga huʻuhuʻu. Ka ko e kikite ʻa e Tohitapú ʻoku ʻi ai hono makatuʻunga fefeka fakaeʻulungaanga. ʻOkú ne fakamatalaʻi ʻa e ʻuhinga ʻoku pau ai ke fai ʻe he ʻOtuá ʻa e meʻa kuó ne ʻosi fakataumuʻá. (2 Kalonikali 36:15 [2 Fakamatala Mea Hokohoko, PM]) Pea ʻoku ʻikai ʻaupito taʻefakahoko ʻa e ngaahi kikite ʻa Sihová, he ko e “ʻOtua taʻefaʻa loi.” (Taitusi 1:2) Ko ia ai, ko e faʻahinga tāutaha naʻe tataki ʻe he Folofola ʻa e ʻOtuá ʻoku nau moʻui ʻi ha ngaahi moʻui fakamaama, mohu taumuʻa, mo fiefia ʻo ʻikai tolovekaʻaki honau taimi mahuʻingá mo e koloá ʻi he tuli ki he ngaahi meʻa launoá.—Sāme 25:12, 13.
Ko e ngaahi meʻá ni mo e ngaahi poini lahi kehe kuo fai ʻa e lāulea ki ai ʻi he ngaahi Fakataha-Lahi Fakavahe “Folofola Fakaekikite ʻa e ʻOtuá” 1999/2000 ʻa e Kau Fakamoʻoni ʻa Sihová, ʻoku fai takatakai ʻi he māmaní. Ko e ngaahi malanga, ngaahi fakaʻekeʻeke, ngaahi fakahāhā, mo ha tulama faka-Tohitapu kuó ne tohoaki ʻa e tokanga ʻa e kau fanongó ki he tofiʻa fakalaumālie fakaofo ʻoku fiefia ai ʻa e faʻahinga ko ia ʻoku nau ako mo ngāueʻaki ʻa e folofola fakaekikite ʻa e ʻOtuá. Ko e kupu hoko maí ʻe fakamanatu ai ʻa e ngaahi meʻa mahuʻinga fakalotomāfana ʻi he fakataha-lahí.