Ko ha Taʻu Makehe ki Hono Tufaki ʻo e Tohitapú

ʻOKU tokolahi ange ʻa e kakai he taimí ni ʻoku nau maʻu ha Tohitapu. Ko ha līpooti ia mei he ngaahi fokotuʻu ʻa e ngaahi Sōsaieti Tohitapu Fakatahatahá, ki hono tufaki ʻo e Tohitapú ʻi he 1998 naʻe tupu hake ʻaki ha haafe miliona mei he taʻu ki muʻá. ʻI hono fakalūkufuá, ʻoku laka hake ʻi he ngaahi Tohitapu ʻe 585,000,000​—kakato, pe ʻi he konga pē​—naʻe tufaki takatakai ʻi he kolopé. “ʻOku fakatupunga nai heni ʻa e fakalototoʻá,” ko e fakahā ia ʻa e līpōtí. “Kuo aʻu ʻa e Folofola ʻa e ʻOtuá ki he kakai lahi ange he ʻahó ni.”

Ko ia ai, ʻoku ʻi ai ha faikehekehe ʻi hono maʻu ha Tohitapu pea mo hono lau iá. Ko e fakatātaá, ko e savea ʻe taha, naʻe fakahaaʻi ai ʻoku laka hake ʻi he peseti ʻe 90 ʻo e kau nofo ʻi ʻAmeliká ʻoku nau maʻu ʻo ʻikai toe siʻi hifo ʻi he Tohitapu ʻe tahá, pea ko ha tokolahi tatau ʻoku nau tui ko e Tohitapú ko ha matavai lelei ia ʻo e akonaki ki he ʻulungāngá. Kae kehe, ko e peseti pē ʻe 59 naʻa nau pehē naʻa nau hanga ki he Tohitapú ki ha faleʻi. Pea naʻe tala moʻoni ʻe he peseti ʻe 29 ko kinautolú ʻoku “ʻikai fuʻu” pe “ʻikai ʻaupito” maheni mo e Tohitapú.

Ko e Kau Fakamoʻoni ʻa Sihová ʻoku ʻikai ngata pē ʻi heʻenau pulusi mo tufaki ʻa e ngaahi Tohitapú ka ʻoku nau toe fai ha ngaahi ako Tohitapu ʻi ʻapi mo e kakai ʻi he ngaahi fonua laka hake ʻi he 230. Ko e laui miliona ʻi māmani lahi ʻoku nau maʻu ʻaonga he taimí ni mei he polokalama ako Tohitapu ko ʻení. ʻOku tokoniʻi ai kinautolu ke nau fekuki mo e ngaahi palopalema ʻoku nau fehangahangai mo ia he taimi ní, pea ʻoku nau ako ʻa e meʻa ʻoku leaʻaki ʻe he Tohitapú fekauʻaki mo ha kahaʻu ʻāsinisini ʻi he malumalu ʻo e Puleʻanga ʻo e ʻOtuá.​—Aisea 48:​17, 18 (Isaia, PM); Mātiu 6:​9, 10.

[Fakatātā ʻi he peesi 32]

Ngaahi ako Tohitapu (takai mei toʻohema ʻi ʻolungá) ʻi Polivia, Kana, Suli Langikā, mo ʻIngilani