Faʻahinga ʻo e Tangatá—Ko ha Fanga Monumanu Pē Ia ʻOku Māʻolunga Ange?

“ʻOku ʻi ai hano kehe ʻo e meʻa ʻoku tau tui ki ai ʻo fekauʻaki mo e tupuʻanga ʻo e moʻuí?”

Ko ha taʻahine taʻu 16 ʻi Pelēsila naʻá ne ʻomai ʻa e fehuʻi ko ʻení ʻi he talateu ki heʻene malanga ʻi he kaveinga ko e “Faʻahinga ʻo e Tangatá​—Ko ha Fanga Monumanu Pē Ia ʻOku Māʻolunga Ange?” Naʻe fakaafeʻi ia ʻe heʻene faiakó ke ne lea ki he kalasí ʻi he foʻi fehuʻi ko iá, ʻi he hili hono maʻu ʻe he faiakó ha tatau ʻo e ʻīsiu ʻo e Awake! ʻo Sune 22, 1998, ʻi he kaveinga ko iá.

Naʻe fakaeʻa ʻe he finemui Fakamoʻoní ʻa e founga tofu pē ko ia ʻoku fakatuʻutāmaki ai ʻa e akonaki ʻo e ʻevolūsoné ʻo makatuʻunga ʻi he tupu fakanatulá. Koe fakatātaá, ʻoku ongoʻi ʻe he kakai tokolahi ʻoku taki atu ʻe he fakakaukau fakamahalo fakaʻevolūsoné ʻa e niʻihi ke nau vakai ki he taú ko ha konga fakaenatula pē ia ʻo e fāinga taʻengata ki he hao moʻuí, ʻo tokoni ia ki hono tofa ʻa e hala ki he fakalakalaka ʻo e Fāsisí mo e tui faka-Nasí.

Naʻe fakahaaʻi ʻe he taʻahine akó ʻoku ʻi ai ha fuʻu ʻatā lahi ʻi he vahaʻa ʻo e faʻahinga ʻo e tangatá mo e fanga monumanú. Naʻá ne pehē: “Ko e faʻahinga pē ʻo e tangatá ʻoku lava ke nau fakalakalaka fakalaumālié. Ko e faʻahinga pē ʻo e tangatá ʻoku nau feinga ke ʻiloʻi ʻa e ʻuhinga mo e taumuʻa ʻo e moʻuí. Ko e faʻahinga pē ʻo e tangatá ʻoku fakahohaʻasi kinautolu ʻe he maté, ʻo nau hohaʻa ʻo fekauʻaki mo honau tupuʻangá, pea maʻu ha holi ke moʻui taʻengatá. He mahuʻinga ē ke tau fakamoleki ha taimi ke tau kiʻi fekumi lahi ange ai ʻo fekauʻaki mo hotau tupuʻangá!”

Naʻe fakahīkihikiʻi ʻe he faiakó ʻa e lea lelei naʻe faí. Naʻá ne taku ko ʻene lavameʻá ko e moʻoniʻi meʻa ko ia ko e saiʻia ʻa e kiʻi Fakamoʻoni taʻu hongofulu tupu ko ʻení he lautohí. ʻOku ʻiloa ʻa e taʻahiné ʻi he ʻapiakó ko ha tokotaha lautohi vēkeveke ʻo e ngaahi tohi pehē makatuʻunga ʻi he Tohitapú ʻo hangē ko e Awake! mo e Taua Leʻo.

ʻOku tokanga loto-moʻoni ʻa e Kau Fakamoʻoni ʻa Sihová fekauʻaki mo e uesia ko ia ʻoku fai ʻe he fakakaukau fakamahalo fakaʻevolūsoné ki he loto mo e ʻatamai ʻo e kau talavoú. ʻI he ʻuhinga ko ʻení, ʻoku fakalototoʻaʻi ai ʻe he fakatahaʻanga ko ia ʻoku feohi mo e finemuí ʻa e kau talavou Fakamoʻoní ke nau ʻoatu ha tatau ʻo e makasini Awake! ʻo Sune 22, 1998, ki heʻenau kau faiakó mo e kaungāakó. Ko e ngaahi makasini nai ʻe 230 naʻe tufaki ʻi he ngaahi ʻapiako kehekehe ʻi he koló. Ko e pule ʻo e Potungāue Saienisí ʻi he ʻapiako ʻe taha naʻá ne tukuhau ki he makasini Awake!

ʻIo, ʻoku ʻi ai hono kehe ʻo e meʻa ʻoku tau tui ki ai ʻo fekauʻaki mo e tupuʻanga ʻo e moʻuí! Kuo fakahaaʻi ʻe he kiʻi finemui ko ʻení mo hono ngaahi kaumeʻá ko e tui ki he Tokotaha-Fakatupú kuó ne ʻai ke ʻi ai ha kehe moʻoni ʻi heʻenau moʻuí.