Ko e Meʻa ʻOkú Ne Manatu ki Ai Fekauʻaki mo Niu ʻIoké
KO E fakaʻilonga naʻe hā hení naʻe fakahaaʻi mahino ia ʻi he taha ʻo e ngaahi fale ngāue ʻo e Sōsaieti Taua Leʻó, ʻi Niu ʻIoke, talu mei he 1950 tupú. Ko e kau folau ʻeveʻevá, kau ʻaʻahí, pea mo e niʻihi kehe ʻoku nau fakalaka aí ʻoku fakamanatu kiate kinautolu ke lau fakaʻaho ʻa e Tohitapú. Ko e tohi hoko haké, naʻe maʻu mei ha kiʻi taʻahine Fakamoʻoni, ʻoku hā ai ʻa e ola lelei ʻo e fakamanatu ko ʻení.
“Naʻá ku fetalanoaʻaki mo haku kaungāako ki he meʻa te u fiemaʻu ke fai ʻi he taimi te u ʻosi ai mei he ako māʻolungá. Naʻá ku kamata talanoa fekauʻaki mo Pēteli, ko e ʻuluʻiʻōfisi ʻo e Kau Fakamoʻoni ʻa Sihová, pea naʻá ne loto-fiefia ʻaupito. Naʻá ne talamai kiate au naʻá ne nofo ʻi Niu ʻIoke ʻi he kotoa ʻo ʻene moʻuí. Ko hono fāmilí naʻe ʻikai te nau fuʻu lotu, ka ʻi he pongipongi kotoa pē ʻi he taimi naʻá ne sio atu ai ki tuʻa he matapā sioʻatá, naʻe ʻi ai ha fakaʻilonga ʻa ia ʻoku pehē ‘Lau Fakaʻaho ʻa e Folofola ʻa e ʻOtuá ko e Tohitapu Māʻoniʻoní.’ Ko ia ʻi he ʻaho kotoa pē naʻá ne lau ai ʻene Tohitapú ki muʻa ke ne ʻalu ki he akó.
“ʻI he hili ʻa e hiki mei he koló, naʻá ne pehē ko e meʻa naʻá ne manatu ki ai fekauʻaki mo Niu ʻIoké ko e taimi ʻokú ne ʻā hake aí, ʻoku ʻikai te ne toe sio ki he fakamanatu ke lau ʻene Tohitapú. Ka koeʻuhi ko e fakaʻilonga ʻi he fale Taua Leʻó, kuo hoko ai ʻa e lau Tohitapú ko ha meʻa ke angaʻaki, ko ia naʻá ne hokohoko atu ke lau fakaʻaho ʻa e Tohitapú!”
Ko e hā ha founga ʻe toe lelei ange ka ko hono kamata ʻa e ʻahó ʻaki hono lau ha konga ʻo e Folofola ʻa e ʻOtuá! ʻI he fai peheé, ʻe ʻikai ha veiveiua te tau hoko ai ʻo mahinoʻi ʻa e ngaahi lea ʻa e ʻapositolo ko Paulá: “[Ko e] Tohitapu . . . ʻoku ne mafai ke fakapoto koe ke maʻu ʻa e fakamoʻui ʻi he tui ʻoku ʻia Kalaisi Sisu.”—2 Timote 3:15-17.