Līpooti ʻa e Kau Kanongonongo ʻo e Puleʻangá
“ʻOkú Ke ʻIlo Lahi ʻAupito Fekauʻaki mo e Tohitapú”
ʻI HE taimi naʻe lea loto-toʻa ai ʻa e taʻu 12 ko Sīsuú ki he kau takilotu ʻi Selusalemá, “ko kinautolu kotoa pē naʻe fanongo kiate ia, naʻa nau fakatumutumu ʻi he anga o ʻene fakakaukau mo ʻene ngaahi tali.” (Luke 2:47) ʻOku meimei tatau pē ʻi he ʻahó ni, ko e tokolahi ʻo e kau sevāniti kei talavou ʻa Sihová ʻoku nau loto-toʻa ʻi he lea ki heʻenau kau faiakó mo e kaungāakó ʻo kau ki he ʻOtuá pea mo e Tohitapú, pea ʻoku nau faʻa hokosia ʻa e ngaahi ola fakafiemālietatau.
Ko Tiffany, taʻu 14, naʻá ne ʻi ha kalasi ʻa ia naʻe fetalanoaʻaki hangatonu ai ki he kikite ʻa e Tohitapú fekauʻaki mo e ngaahi uike ʻe 70 ʻo e ngaahi taʻú, ʻoku maʻu ʻi he Taniela 9:24-27. Naʻe ʻoatu ʻe he faiakó ha ngaahi moʻoniʻi meʻa ʻe niʻihi fekauʻaki mo e ngaahi vēsí pea kiʻi lave vave pē ki he kaveingá.
ʻI he ʻuluaki taimí, naʻe toumoua ʻa Tiffany fekauʻaki mo hono hiki hake hono nimá. “Ka ʻi he ʻuhinga ʻe niʻihi,” ʻokú ne pehē, “naʻe fakahohaʻasi ai au he ko e ngaahi vēsí naʻe ʻikai ke fakamatalaʻi kakato. Pea naʻe fakafokifā pē ʻa e ʻi ʻolunga hoku nimá.” Naʻe ʻohovale ʻa e faiakó ke ʻi ai moʻoni ha tokotaha ʻoku ʻi ai ha meʻa ke ne leaʻaki fekauʻaki mo e kaveingá, koeʻuhi ko e tokolahi taha ʻo e fānau akó naʻa nau maʻu ha taimi faingataʻa ke nau mahinoʻi ia.
ʻI hono ʻoange ha faingmālie ke fakamatalaʻi ai ʻa e kikité, naʻe tuʻu hake ʻa Tiffany peá ne lea taʻeʻiai haʻane mateuteu. ʻI heʻene ʻosí, naʻe ʻi ai ha fuʻu fakalongolongo ʻi he loki akó. Naʻe kiʻi ilifia ʻa Tiffany. Pea naʻe pasipasi lōloa mai leva ʻa e kalasí.
“ʻOku maongo ʻaupito, Tiffany, ʻoku maongo ʻaupito,” ko e toutou lea ange ia ʻa e faiakó. Naʻá ne fakamoʻoniʻi naʻá ne ʻilo kuo pau pē ʻoku ʻi ai ʻa e ngaahi meʻa lahi ange ia ai ki he ngaahi veesi ko iá, ka ko Tiffany ko e ʻuluaki tokotaha ia kuó ne fakamatalaʻi ange kiate kinautolu ia ʻo mahino ʻaupito. ʻI he tuku ʻa e kalasí, naʻá ne ʻeke ange ai kia Tiffany ʻa e founga naʻá ne fuʻu ʻilo lahi ai fekauʻaki mo e Tohitapú.
“Ko hono ʻuhingá pē he ko e taha au ʻo e Kau Fakamoʻoni ʻa Sihová,” ko ʻene talí ange ia. “Naʻe fakamatalaʻi mai ʻe heʻeku ongo mātuʻá kiate au ʻo tuʻo lahi ʻa e kikite ko iá ki muʻa ke u mahinoʻi iá.”
Naʻe ʻohovale ʻaupito ʻa e kalasí ʻi heʻene ʻilo ʻa e Tohitapú. Ko e tokotaha ako ʻe taha naʻá ne pehē ange kia Tiffany: “ʻOku ou ʻiloʻi he taimí ni ʻa e ʻuhinga ʻoku ʻalu ai ʻa kimoutolu Kau Fakamoʻoni ʻa Sihová mei he matapā ki he matapaá; ko hono ʻuhingá he ʻoku mou fuʻu ʻilo ʻaupito fekauʻaki mo e Tohitapú.” Naʻe palōmesi ange ʻa e niʻihi heʻikai te nau toe fakamataliliʻi ia fekauʻaki mo ʻene ngaahi tuí.
ʻI he taimi naʻe tala ange ai ʻe Tiffany ki heʻene ongo mātuá fekauʻaki mo e meʻa naʻá ne hokosiá, naʻá na fokotuʻu ange ke ne tuʻuaki ʻa e tohi ʻIlo ʻA Ia ʻOku Taki Atu ki he Moʻui Taʻengatá ki heʻene faiakó. ʻI he taimi naʻá ne fai pehē aí naʻá ne fakahā ange ki he faiakó ʻa e konga ko ia ʻokú ne fakamatalaʻi ʻa e kikite ʻa Tanielá, naʻá ne mateuteu ke tali ʻa e tohí peá ne fakamālō ange kiate ia fekauʻaki mo e tohí.
Ko e moʻoni, ʻi he taimi ʻoku lea loto-toʻa ai ʻa e toʻutupú fekauʻaki mo e meʻa kuo akoʻi ʻe heʻenau ngaahi mātuʻá ʻo fekauʻaki mo e ʻOtuá pea mo e Tohitapú, ʻoku nau ʻomai ai ʻa e fakahīkihiki mo e fakaʻapaʻapa kia Sihova pea mo e ngaahi tāpuaki kiate kinautolu.—Mātiu 21:15, 16.