Ko ha Kātoanga Makehe—Te Ke ʻI Ai?

ʻI HA ʻaho fakamanatu laka hake ʻi he taʻu ʻe 3,500 kuohilí, naʻe ʻai ai ʻe Sihova ko e ʻOtuá ʻa e ʻapi taki taha ʻo e kau ʻIsileli nofo pōpula ʻi ʻIsipité ke tāmateʻi ha lami pe ko ha kosi pea afuhiʻaki hono totó ʻa e ngaahi kau-matapā mo e ngaahi funga matapā ʻo honau ngaahi falé. ʻI he pō pē ko iá, naʻe laka atu ai ʻa e ʻāngelo ʻa e ʻOtuá ʻi he ngaahi fale naʻe fakaʻilongaʻi ʻi he founga ko ʻení ka ne tāmateʻi ʻa e ʻuluaki foha ʻi he ngaahi ʻapi ʻo e kau ʻIsipité kotoa. Naʻe toki tauʻatāina leva ʻa e kau ʻIsilelí. ʻI hono fakamanatu fakataʻu ʻo e meʻa ko ia naʻe hokó, naʻe kātoangaʻi ʻe he kau Siú ʻa e Laka-Atú.

ʻI he hili pē ʻa hono kātoangaʻi ʻe Sīsū Kalaisi ʻa ʻene Laka-Atu fakaʻosí mo ʻene kau ʻapositoló, naʻá ne kamata ai ha kai ʻa ia te ne fakamanatu ʻa ʻene pekia fakaefeilaulaú. Naʻá ne ʻoange ki heʻene kau ʻapositoló ʻa e mā taʻelēvani peá ne pehē: “Toʻo ʻo kai; ko hoku sino ʻeni.” Pea naʻá ne ʻoange kiate kinautolu ha ipu uaine ʻo ne pehē: “Mou inu kotoa pe mei ai; he ko hoku toto ʻeni ‘ko e toto fuakava,’ ʻa ia ʻoku lilingi koeʻuhi ko e tokolahi ke lava ai ʻa e fakamolemole angahala.” Naʻe toe pehē ʻe Sīsū: “Mou fai ʻeni mōku fakamanatu.” (Mātiu 26:​26-28; Luke 22:​19, 20) Ko ia, naʻe fekauʻi ʻe Sīsū hono kau muimuí ke nau tauhi ʻa e kātoangaʻi ko ʻeni ʻo ʻene pekiá.

ʻI he taʻú ni ko e fakamanatu fakataʻu ʻo e pekia ʻa Sīsuú ʻoku hoko ia ʻi he Pulelulu, ʻEpeleli 19, hili ʻa e tō ʻa e laʻaá. Ko e Kau Fakamoʻoni ʻa Sihova takatakai ʻi he māmaní te nau fakatahataha ki he pō makehe ko ʻení ke kātoangaʻi ʻa e Fakamanatu ko ʻení ʻi he founga naʻe kole ki ai ʻe Sīsuú. ʻOku fakaafeʻi mātuʻaki loto-māfana atu koe ke ke kau fakataha mo kimautolu ʻi he tuʻunga ko e kau kātoangaʻi. Kātaki ʻo vakaiʻi mei he Kau Fakamoʻoni ʻa Sihova ʻi ho feituʻú ʻa e feituʻu mo e taimi pau ʻo e fakatahá.