Ko e Foaki ʻA Ia ʻOku Mahuʻinga ʻi he Vakai Mai ʻa Sihová
Ko e tohi hoko haké naʻe maʻu ia ʻe he ʻōfisi vaʻa ʻo e Kau Fakamoʻoni ʻa Sihova ʻi Mōsemipīkí:
“Ko ha kiʻi tamasiʻi taʻu fitu au. ʻOku ou kei ʻalu pē ki he lautohi siʻí. ʻOku ou ʻoatu ʻa e paʻanga ko eni kuó u maʻu mei hono tauhi hake ʻo ha kiʻi moa. Naʻá ku fakatau atu ia ki he Meticais ʻe 12,000 [$1, U.S.]. ʻOku ou fakamālō kia Sihova ʻi heʻene ʻai ʻa e ʻuluaki kiʻi moa kuó u tauhí ke ne tupu ʻo hoko ko ha moa taʻané. Te u saiʻia ke ngāueʻaki ʻa ʻeku meʻaʻofá ki he ngāue ʻa e Puleʻanga ʻo Sihová.
“PS: Naʻe tokoniʻi au ʻe heʻeku tamaí ʻi hono fai ʻa e tohi ko ení.”
ʻOku fakakau ʻe he kakai ʻe niʻihi ʻa e nima-homó ki he faʻahinga ko ia ʻoku nau maʻu ʻa e ngaahi meʻa lahi fakamatelié. Kae kehe, ʻi he taimi ʻoku tau lau ai ʻa e fakamatala ʻa e Tohitapú ʻo fekauʻaki mo e uitou ʻa ia naʻá ne lī ha “ongo kiʻi paʻanga kapa” ki he tukuʻanga meʻaʻofá, ʻoku lava ke tau houngaʻia ʻi hono fakafuofua ʻa e nima-homó, ʻikai ʻaki ʻa hono lahí, ka ko e hehema tonu ʻo e lotó.—Luke 21:1-4.
ʻOku houngaʻia ʻa Sihova ʻi he meʻaʻofa kotoa pē, tatau ai pē pe ʻoku siʻi, ʻa ia ʻoku tupu mei he loto kuo ueʻi ʻe he ʻofá. Pea ʻokú ne tāpuakiʻi lahi ʻa e faʻahinga ko ia ʻoku nau faʻifaʻitaki ki heʻene nima-homó ʻaki hono foaki atu honau taimí, iví, pe ngaahi koloa fakamatelié koeʻuhi ko hono Puleʻangá.—Mātiu 6:33; Hepelu 6:10.