Līpooti ʻa e Kau Fanongonongo ʻo e Puleʻangá
Ko e Moʻui Fakafāmili Fiefiá ʻOku Tohoakiʻi Ai ʻa e Niʻihi Kehé ki he ʻOtuá
NAʻE tāpuakiʻi ʻe Sihova ʻa Siosifa ʻaki ʻa e poto mo e ʻiloʻilo lahi. (Ngāue 7:10) Ko hono olá, ko e poto ʻo Siosifá “naʻe ha lelei [ia] kia Felo, mo ʻene kau tamaioʻeiki kotoa.”—Senesi 41:37.
ʻOku meimei tatau ʻi he ʻahó ni, ʻoku ʻoange ʻe Sihova ki hono kakaí ʻa e poto mo e ʻiloʻilo fakafou ʻi heʻenau ako ʻa e Tohitapú. (2 Timote 3:16, 17) Ko e poto mo e ʻiloʻilo ko ʻení ʻokú na fakatupu mai ʻa e fua lelei ʻi hono ngāueʻaki ʻa e akonaki makatuʻunga ʻi he Tohitapú. Ko ʻenau ʻulungaanga leleí ‘naʻe [faʻa] ha lelei ia ki he mata ʻo e faʻahinga ʻoku fakatokangaʻi iá,’ hangē ko ia ʻoku fakahāhaaʻi ʻe he ngaahi meʻa ko ʻeni naʻe hokosia mei Simipāpueé.
• Naʻe maʻu ʻe ha fefine ha kaungāʻapi ko e kau Fakamoʻoni ʻa Sihova. Neongo naʻe ʻikai te ne saiʻia ʻi he Kau Fakamoʻoni ʻa Sihová, naʻe maongo kiate ia ʻa honau ʻulungāngá, tautautefito ki heʻenau moʻui ʻi ʻapí. Naʻá ne fakatokangaʻi ko e husepānití mo e uaifí naʻá na maʻu ha vahaʻangatae lelei ʻaupito pea ko ia ko ʻena fānaú naʻa nau talangofua. Naʻá ne fakatokangaʻi tefito ʻa e ʻofa loloto ʻa e husepānití ʻi hono uaifí.
Ko e tui ʻiloa ʻi he ngaahi tōʻonga faka-ʻAfilika ʻe niʻihi kapau ko ha husepāniti ʻoku ʻofa ʻi hono uaifí, kuo pau ke ngāueʻaki ʻe he uaifí ha meʻa fakafaimana ke “fakalalataʻi” ʻa e husepānití. Ko ia naʻe fakaofiofi atu ʻa e fefiné ki he uaifi Fakamoʻoní peá ne kole ange kiate ia: “Kātaki ʻe lava ke ke ʻomai kiate au ʻa e meʻa fakafaimana ʻokú ke ʻoange ki ho husepānití koeʻuhí kae ʻofa hoku husepānití ʻiate au ʻo hangē ko hoʻoú ʻiate koé?” Naʻe tali ange ʻa e Fakamoʻoní: “ʻO, ʻio, te u ʻoatu ia maʻau ʻi he hoʻatā ʻapongipongí.”
ʻI he ʻaho hono hokó, naʻe ʻaʻahi atu ʻa e tuofefiné ki hono kaungāʻapí mo ʻene “meʻa fakafaimaná.” Ko e hā ia? Ko e Tohitapú fakataha mo e tohi ʻIlo ʻA Ia ʻOku Taki Atu ki he Moʻui Taʻengatá. ʻI he hili hono fai ha lāulea ki he fakamatala mei he tohi ʻIlo ʻi he kaveinga “Ko Hono Faʻu ha Fāmili ʻOku Fakalāngilangiʻi Ai ʻa e ʻOtuá,” naʻá ne tala ange ki he fefiné: “Ko e ‘meʻa fakafaimana’ ʻeni ʻoku ‘fefakalalataʻaki’ ai ʻa e husepānití mo aú, pea ko e ʻuhinga ia ʻokú ma feʻofaʻaki lahi pehē ai ʻiate kimauá.” Naʻe kamata ha ako Tohitapu, pea naʻe fakalakalaka vave ʻa e fefiné ʻo aʻu ki ha tuʻunga ko hono fakahāhaaʻi ʻene fakatapui kia Sihová ʻaki ʻa e fakauku ʻi he vaí.
• Ko e ongo tāimuʻa makehe ʻe toko ua naʻe vaheʻi ki ha fakatahaʻanga siʻisiʻi ofi ki he kauʻā fonua fakatokelau ʻo Simipāpuē mo Mosemipīkí naʻe ʻikai te na ʻalu ʻi he ngāue matapā-ki-he-matapaá ʻi he uike ʻe ua. Ko e hā hono ʻuhingá? Koeʻuhí he naʻe haʻu ʻa e kakaí kiate kinaua ke fanongo ki he meʻa ʻokú na leaʻakí. ʻOku lave ʻa e taha ʻi he ongo tāimuʻá ki he anga ʻo e hoko ʻa e meʻá ni: “Naʻá ma fononga ʻi he kilomita ʻe 15 ke fai ha ako Tohitapu fakauike mo ha tokotaha mahuʻingaʻia. Naʻe ʻikai ke faingofua kiate kimaua ke ma aʻu ki he feituʻu ko ʻení. Naʻe pau ke ma lue ʻi he pelepelá, pea naʻe pau ke ma kolosi ʻi he ngaahi vaitafe naʻe aʻu hake ki homa kiá. Naʻe kau ki heni ʻa hono hili fakamafamafatatau ʻa homa ngaahi valá mo homa suú ʻi homa ʻulú, fononga atu ʻi he vaitafé, peá ma toe tui vala leva ʻi he tafaʻaki ʻe tahá.
“Naʻe maongo ʻaupito ki he ngaahi kaungāʻapi ʻo e tokotaha mahuʻingaʻiá ʻa ʻema faivelengá. ʻI he lotolotonga ʻo e faʻahinga naʻa nau fakatokangaʻí ko e taki ʻo ha kautaha fakalotu ʻi he feituʻú. Naʻá ne pehē ki hono kau muimuí: ‘Meʻanī ʻoku ʻikai te mou fiemaʻu ke mou hoko ʻo faivelenga ʻo hangē ko e ongo tangata kei talavou ko ia ʻo e Kau Fakamoʻoni ʻa Sihová?’ ʻI he ʻaho hono hokó, ko e tokolahi ʻo hono kau muimuí naʻa nau haʻu ki homa ʻapí ke ʻilo ki he ʻuhinga naʻá ma fuʻu kītaki pehē aí. Tānaki atu ki ai, ʻi he uike ʻe ua hoko maí, naʻe ʻi ai ʻema kau ʻaʻahi tokolahi pea naʻe aʻu ʻo ʻikai pē ke ʻi ai hama taimi ke teuteu ai haʻama meʻakai!”
Ko e taha ʻo e faʻahinga tāutaha naʻe ʻaʻahi ki he ʻapi ʻo e ongo tāimuʻá he lolotonga ʻo e vahaʻa taimi ʻo e uike ʻe ua ko ʻení ko e taki lotú. Fakaʻuta atu ki he fiefia ʻa e ongo tāimuʻá ʻi he taimi naʻá ne tali ai ha ako Tohitapu ʻi ʻapi!