Tauhi Maʻu ʻa e Mateaki kia Sihová

KO E mateakí, neongo ʻa e siʻi hono mahuʻingá ʻi he ʻahó ni, ko e ʻulungaanga ia ʻokú ne fakaʻilongaʻi ʻa e kau sevāniti ʻa e ʻOtua moʻoni, ko Sihová. ʻOku kei tuʻumaʻu pē ʻa e tokotaha mateakí lolotonga ʻa e ngaahi ʻahiʻahí pea taʻetoeveiveiua neongo e ʻalu ʻa e taimí. Fakakaukau ʻangé ki he tuʻi lelei ko Hesekaiá. “Naʻe ʻikai ha taha ʻo e ngaahi Tuʻi Siuta ki mui naʻe tatau mo ia, pe ha taha ʻiate kinautolu na ʻe holomuʻa ʻiate ia,” ko e lau ia ʻa e Tohitapú. Ko e hā naʻá ne ʻai ʻa Hesekaia ke makehe atú? Naʻá ne “pikitai kia Sihova,” neongo naʻe ʻātakaiʻi ia ʻe he kau lotu ʻo e ʻotua loi ko Mōlekí. ʻIo, ko Hesekaia “naʻe ʻikai te ne afe mei he muimui kiate ia [Sihova], ka naʻa ne tauhi ʻa e ngaahi tuʻutuʻuni.”—2 Tuʻi 18:​1-6.

Ko e ʻapositolo ko Paulá ko e toe tokotaha ia naʻá ne tauhi maʻu ʻene mateaki kia Sihová. Ko e lēkooti ʻo ʻene ngāue fakafaifekaú ʻo hangē ko ia ʻoku maʻu ʻi he Ngaahi Konga Tohi Faka-Kalisi Kalisitiané ʻokú ne ʻomai ha fakamoʻoni maeʻeeʻa lelei ki he tuʻumaʻu ʻa Paula ʻi hono ʻoatu ʻa e ngāue ʻaufuatō ki he ʻOtuá. ʻI he aʻu ki he ngataʻanga ʻo ʻene moʻui ʻi he māmaní, naʻe malava ke leaʻaki ʻe Paula kiate ia tonu: “Kuo u tau ʻa e tau lelei, kuo u lavaʻi ʻa e fakapuepue, kuo u tauhi mai ʻa e tui totonu.”—2 Timote 4:7.

He ngaahi faʻifaʻitakiʻanga lelei ē ʻo e mateakí ʻoku tau maʻu ʻia Hesekaia mo Paulá! ʻOfa ke tau faʻifaʻitaki ki heʻena tuí ʻaki ʻa e tauhi maʻu ʻa e mateaki ki hotau ʻOtua Maʻongoʻonga, ko Sihová.—Hepelu 13:7.