ʻOku ʻOmai ʻe he Ngaahi Ngāue Leleí ʻa e Lāngilangi ki he ʻOtuá
KO E faʻahinga ʻoku ʻofa ki he ʻOtuá ʻoku nau feinga ke tapua atu ʻa e maama fakalaumālie mei heʻene Folofolá, ko e Tohitapú. ʻI he founga ko ʻení, ʻoku nau muimui ai ki he fekau ʻa Sīsuú: “Ke ulo atu hoʻomou māma ke hā ki he kakai, ke nau mamata ki hoʻomou ngāhi ngaue lelei, pea fakamāloʻia ʻa hoʻomou Tamai ʻoku ʻi Hevani.” (Mātiu 5:16) Ko e lea kuo folofolaʻakí pea pehē ki he ʻulungaanga totonú ʻoku lava ke ne ʻomai ʻa e lāngilangi ki he ʻOtuá.
ʻOku kumi ʻa e Kau Fakamoʻoni ʻa Sihová ke fakahōifuaʻi ʻa e ʻOtuá ʻaki ʻenau ngāue ʻo fehoanaki mo e Tohitapú pea ʻi heʻenau feinga ke tokoniʻi fakalaumālie ʻa e niʻihi kehé. ʻOku nau fai pehē naʻa mo e ʻi he ngaahi fonua ʻoku teʻeki ke lēsisita fakalao ai ʻenau ngāue fakafaifekaú. ʻI he fonua kolomuʻa ʻi he taha ʻo e ngaahi fonua ko ʻení, kuo fai ai ʻe he Kau Fakamoʻoní ʻa e ngaahi fakataha-lahi fakataʻu ʻo kau ki ai ʻa e kakai ʻi he vahaʻa ʻo e toko 6,000 ki he 9,000. Ki he ngaahi fakatahataha peheé, kuo nau totongi ai ʻa e ngaahi holo ʻi ha ngaahi ʻotu fale lalahi ʻa ia ʻoku fai ai ʻa e ngaahi fakaʻaliʻalí. Hangē ko ia naʻa nau fai ʻi he ngaahi taʻu ki muʻá, ki muʻa ʻi heʻenau fakataha-lahi ʻi he 1999, naʻe ngāue mālohi ai ʻa e Kau Fakamoʻoni ʻe lauingeau ke fakamaʻa ʻa e ngaahi falé pea fokotuʻu ai ha meʻa fakaleʻolahi pea mo e ngaahi sea ʻe laui afe.
Ko e kotoa ʻo e teuteu ko ʻení naʻe ʻikai ke taʻefakatokangaʻi. Ko e kau ngāue ʻoku nau tokangaʻi ʻa e ʻotu falé naʻa nau siofi ʻa e ngaahi ngāue ko ʻení. Naʻa nau toe sio ai, neongo naʻe ʻi ai ha tumutumu ʻo e kau maʻu fakataha ʻe toko 15,666, naʻe lele lelei ʻa e meʻa kotoa pē pea ko e Kau Fakamoʻoní naʻa nau fuʻu maau ʻaupito. Naʻe toe maongo foki ki he kau ngāué ʻa e fakamaʻa fakaʻāuliliki naʻe fai ʻi he hili iá.
Naʻe fakahaaʻi ʻe he kau ngāué ʻa e houngaʻia ki he kotoa ʻo e meʻá ni ʻaki hono fokotuʻu ʻa e Kau Fakamoʻoní ʻi he lisi muʻomuʻá koeʻuhí ke nau maʻu ʻa e ʻuluaki faingamālie ke haea ʻa e falé ʻi he taʻu ka hoko maí. Ka naʻe fai ʻe he kau ngāué ʻa e meʻa naʻe toe lahi ange. ʻI Siulai 15, 1999, naʻa nau ʻoatu ai ki he kōmiti ʻo e fakataha-lahí ha fakahaaʻi ʻo e houngaʻia. Naʻe tongi ki ha meʻa teuteu fakamanatu ʻa e ngaahi lea ko ʻení “ko e fakatahaʻanga ʻa e Kau Fakamoʻoni ʻa Sihová”—ko ha meʻa taʻeʻamanekina ʻi ha fonua ʻa ia ʻoku fakangatangata ai ʻenau ngāue fakaeako Tohitapú.
Kātoa ʻi he māmaní ʻi he 2000/2001, ʻoku fakatuʻotuʻa atu ai ʻa e laui miliona ke maʻu ʻa e ngaahi Fakataha-Lahi Fakavahe ʻe lauingeau ko e “Kau Fai ki he Folofola ʻa e ʻOtuá” ʻa e Kau Fakamoʻoni ʻa Sihová. ʻI he hoko ʻo ʻi aí, te ke lava ai ʻo fakatokangaʻi ʻa e founga ʻoku kau ai ʻa e faʻahinga ʻoku nau fai fakamātoato ʻa e meʻa ʻoku leaʻaki ʻi he Tohitapú ʻi he ngaahi ngāue lelei ʻokú ne ʻomai ʻa e lāngilangi ki he ʻOtuá.