“Ko ha Faʻifaʻitakiʻanga ʻo e Fāʻūtahá”

KO HA ʻuluʻitohi ia ʻo ha fakamatala ʻa e ʻētitá naʻe pulusi ʻi ha nusipepa ʻi Indaiatuba, São Paulo, Pelēsila. Ko hai naʻá ne tokonaki mai ʻa e faʻifaʻitakiʻangá? “Ko e Kau Fakamoʻoni ʻa Sihova, ʻa ia ʻoku nau palani ke langa ha ‘Fale Fakatahaʻanga’ foʻou, ko honau ngaahi temipalé pe ʻoku ʻiloa ko e ngaahi fale faiʻanga fakatahá, ʻoku nau ʻoatu ha faʻifaʻitakiʻanga pau mo moʻoni ʻo e fāitahá ʻoku ʻikai lava ke tukunoaʻi,” ko e fakamatala ia ʻa e tokotaha-tohí.

Ko e fāʻūtaha ʻi he lotolotonga ʻo e Kau Fakamoʻoni ʻa Sihová ʻoku hā mahino ia ʻi he ngaahi taimi peheé. Ko ia, ʻoku fakahaaʻi ʻe he kupú: “ʻOku fakaueʻiloto ke sio ki he kau tangata, kau fefine, mo e kau taʻu hongofulu tupu ngāue polé ʻoku nau loto-lelei ʻo ngāue fakataha ke langa ha fale ʻa ia ʻe malava ke nau fakatahataha fakataha ai ʻo lotu ki he ʻOtuá.”

ʻOku fokotuʻu ʻe he Kau Fakamoʻoni ʻa Sihová ha faʻifaʻitakiʻanga lelei ʻi he ngaahi tafaʻaki kehé foki. “ʻI he tānaki atu ki he akó mo e lotú, ko ʻenau taumuʻá ke toe fakafoki ki he tuʻunga lelei ʻa e kau ʻolokahōliká mo e faʻahinga ʻoku maʻunimā ʻe he faitoʻo kona tapú pea ke fakahaaʻi ki he kakaí ʻa e hala ki he fāʻūtahá mo e ʻofá,” ko e toe fakamatala ia ʻa e ʻētitá. ʻOku anga-fēfē ʻenau lavaʻi ʻení? ʻOku ʻilo ʻe he Kau Fakamoʻoní ko hono ako mo hono ngāueʻaki ʻa e akonaki faka-Tohitapú ʻoku tokoni ia ki ha taha ke ne tauʻatāina ai mei he ngaahi ʻulungaanga koví. Ko e ʻuhinga ia ʻoku nau feinga ai ke akoʻi ki he niʻihi kehé ʻa e meʻa kuo nau ako mei he Tohitapú. ʻOku fakaʻosiʻaki ʻe he fakamatala ʻa e ʻētitá ko ʻenau faʻifaʻitakiʻangá “ko ha faʻifaʻitakiʻanga ia, ʻoku taʻetoeveiveiua, ʻa e fiemaʻu fakavavevave ke muimui ki aí.”

Ko e ngaahi fakataha ʻa e Kau Fakamoʻoni ʻa Sihová ʻoku ʻatā ia ki he kakaí pea ʻoku ʻikai ke fai ha tānaki paʻanga ai. ʻOku fakaafeʻi loto- māfana atu koe ke ke ʻaʻahi ki ha Fale Fakatahaʻanga ʻoku ofi atu kiate koé.