Founga ʻOku Nau Matuʻuaki Ai ʻa e Tenge mei he Toʻumeʻá
KO E holi ke tali leleí ʻokú ne tākiekina ai ʻa e tokolahi ke nau fakatatau ki he fakakaukau mo e ngaahi tōʻonga ʻa honau ngaahi toʻumeʻá. ʻOku tautefito ki he toʻutupú ʻa e fiemaʻu ke nau maʻu ʻa e mālohi ke fakafisi ke kau ʻi he ngaahi tōʻongafai fakatupu maumaú, hangē ko e ngāuekoviʻaki ʻa e faitoʻo kona tapú pea mo e ʻulungaanga taʻetaau fakaefehokotaki fakasinó. ʻE lava fēfē ke nau matuʻuaki ʻa e tenge mei he toʻumeʻá?
Naʻe tohi ki muí ni mai ʻe ha ongo tamaiki fefine taʻu hongofulu tupu ʻi Pōlani: “Ko e laumālie ʻo e māmaní ʻoku hā māʻalaʻala ia ʻi he lotolotonga ʻo e tokolahi ʻi homau toʻú. ʻOku nau kākā ʻi heʻenau ngaahi siví, ngāueʻaki ʻa e lea ʻuli, pea nau saiʻia ʻi he vala sitailá mo e ngaahi fasi palakū, mo fakaeʻulungaanga taʻetāú. He fiefia ē ka ko kimautolu ke maʻu ʻa e ngaahi kupu ʻokú ne fakahinohinoʻi kimautolu finemuí mo maluʻi kimautolu mei he tākiekina ʻa e kau taʻu hongofulu tupu taʻetopono mo angatuʻú!
“ʻOku ʻikai lava ʻe he ngaahi leá ʻo fakamatalaʻi ʻemau houngaʻia ki he ngaahi kupu ʻi he Taua Leʻo ʻa ia kuó ne ʻai ke maongo kiate kimautolu ʻi he tuʻunga ko e toʻutupú ʻoku fiemaʻu mo fakahoungaʻi kimautolu. Ko e akonaki faka-Tohitapu kuo mau maʻú kuó ne tokoniʻi kimautolu ke tataki totonu ʻemau ngaahi laká koeʻuhi ke hokohoko atu ai ʻemau fakafiefiaʻi ʻa Sihova ko e ʻOtuá. ʻOku mau tuipau ko e ngāue tōnunga kia Sihová ʻa e founga lelei taha ʻo e moʻuí.”
ʻIo, ʻoku lava ke matuʻuaki ʻe he toʻutupú ʻa e tenge mei he toʻumeʻá. ʻI hono akoʻi ʻenau “ngaahi mafai fakaefakakaukaú,” ʻoku ako ai ʻa e kau talavou Kalisitiané ke fai ha ngaahi fili fakapotopoto ʻa ē ʻoku ʻikai ke tapua atu ai ʻa e “laumalie ʻoku ʻo mamani” ka ʻi hono kehé, “ko e Laumalie ʻoku haʻu mei he ʻOtua.”—Hepelu 5:14, NW; 1 Kolinito 2:12.