Ko e Tauʻi ʻo e Masivá—Ko ha Feingatau Ia ʻe ʻUlungia?
KO E kau folau ʻeveʻeva ʻoku nau ʻaʻahi atu ki he Puleʻanga Fakatahatahá ʻi he Kolo Niu ʻIoké ʻoku nau sio ai ʻi he Loki Fakataha ki he meʻa Fakaʻekonōmiká mo Fakasōsialé, ki hono fakaeʻa ʻa hono ʻū ngaahi paipá mo e tiupí ʻi ʻolunga he ʻaofí ʻi he loki maʻá e kakaí. ʻOku fakamatala ʻe he tokotaha taki mamatá: “Ko e ‘taʻeʻosi’ ʻa e ʻaofí ʻoku faʻa vakai ki ai ko ha meʻa fakamanatu fakaefakatātā ia ko e ngāue fakaʻekonōmika mo fakasōsiale ʻa e Puleʻanga Fakatahatahá ʻoku ʻikai ʻaupito ke ʻosi; ʻe ʻi ai maʻu pē ʻa e meʻa lahi ange ʻe malava ke fai ke fakaleleiʻi ʻaki ʻa e ngaahi tuʻunga ʻo e moʻui ʻa e kakai ʻi he māmaní.”
Neongo ko e Fakatahá ʻoku fokotuʻu ia ki he taumuʻa lelei ko hono fakalototoʻaʻi ha tuʻunga lelei ange ʻo e moʻuí ki he tokotaha kotoa pē, ʻoku hā ngali ko e ngāué ʻe ʻikai ke toe ʻosi. ʻOku fakatupu tokangá, lolotonga ʻa e ngāue fakafaifekau ʻa Sīsū Kalaisi ʻi he māmaní ʻi he ʻuluaki senituli T.S., naʻá ne pehē ai: “Ko e Laumalie ʻo e ʻEiki ʻoku ʻiate au; he naʻa ne pani au ke u ʻalu mo e ongoongolelei ki he masiva.” (Luke 4:18) Ko e hā ʻa e “ongoongolelei” naʻá ne fanongonongó? Ko e pōpoaki ia fekauʻaki mo e Puleʻanga ʻe fokotuʻu ʻe Sihova ko e ʻOtuá, ʻa ia ʻoku hoko “ko e hufanga ki he masiva ʻi he . . . mamahi,” pea Tuʻi ai ʻa Sīsū Kalaisi. Ko e hā ʻe fakahoko ʻe he Puleʻanga ko iá? Naʻe kikiteʻi ʻe ʻAisea: “ʻE fai ʻe Sihova Sapaoti ki he ngaahi kakai kotoa pe ha katoanga meʻa lolo, ha katoanga uaine kuo fisi, ʻani meʻa lolo kuo loloʻi ʻaki ʻa e ngako ʻo e hui, ʻani uaine kuo fisi, ʻo sivi ke masivi. Te ne folofua ʻa mate ʻo taʻengata; pea ko Atonai Sihova te ne holoholo ʻa e loʻimata mei he mata fuape.”—Aisea 25:4-6, 8.
Te ke fie ʻilo lahi ange ki he founga ʻe hanga ai ʻe he Puleʻanga ʻo e ʻOtuá ʻo “fakaleleiʻi ʻa e ngaahi tuʻunga ʻo e moʻui ʻa e kakai ʻi he māmaní,” koeʻuhi ke ʻikai toe ʻi ai ha ngaahi fiemaʻu? Sio hifo ki lalo ke ʻilo ʻa e founga te ke malava ai ʻo maʻu ha faiako taau ke ʻaʻahi atu ʻo fakahaaʻi kiate koe ʻa e meʻa lahi ange ʻoku leaʻaki ʻe he Tohitapú fekauʻaki mo e ngaahi meʻá ni.