Līpooti ʻa e Kau Fanongonongo ʻo e Puleʻangá

Fakaʻataʻatā ʻa e Huafa ʻo e ʻOtuá mei Hono Lumaʻí

ʻOKU pehē ʻe he Folofola ʻa e ʻOtuá, ko e Tohitapú: “Mou ʻai ke tāu hoʻomou fakafeangai ki he Senitaile; koeʻuhi, ʻi he meʻa ʻoku nau lauʻikovi ai kimoutolu, tokua ko e faikovi, ke nau mamata ki hoʻomou ngaahi ngaue lelei, pea langaʻi ai ʻenau fakahikihikiʻi ʻa e ʻOtua ʻi he ʻaho ʻo e aʻahi.” (1 Pita 2:12) Ko ia, ko e kau Kalisitiane moʻoní, ʻoku nau feinga ke tauhi maʻu ʻa e ʻulungaanga leleí koeʻuhí ke nau fakaʻehiʻehi mei hano ʻomai ha luma ki he huafa ʻo Sihová.

ʻI ha feituʻu mavahe ʻi Semipia ʻoku ui ko Senanga, naʻe kaihaʻasi ai ha letiō ʻa ha tokotaha faiako mei hono falé. Koeʻuhi ko e faʻa malanga ʻa e Kau Fakamoʻoni ʻa Sihová ʻi he feituʻú, naʻe tukuakiʻi ai ʻe he tangatá kinautolu ki he kaihaʻá. Naʻá ne līpooti ʻa e meʻá ki he kau polisí, ʻo pehē ai naʻe kaihaʻasi ʻe he Kau Fakamoʻoní ʻene letioó. Ke fakamoʻoniʻi naʻe hū ʻa e Kau Fakamoʻoní ki hono falé, naʻá ne fakaʻaliʻali hake ha tuleki ʻa ia naʻá ne maʻu ʻi he falikí. Kae kehe, naʻe fakafisi ʻa e kau polisí ke tui kiate ia. Naʻa nau faleʻi ia ke ne ʻalu ʻo fai ha fakatotolo fakaʻāuliliki lahi ange.

Ko e Kau Fakamoʻoni naʻa nau ngāue ʻi he kaungāʻapi ʻo e tokotaha faiakó ʻi he ʻaho ko iá naʻe fakaʻaiʻai kinautolu ʻe he kulupu ʻo e kau mātuʻá ke nau ō ʻo talanoa mo e tokotaha faiakó fekauʻaki mo e meʻá. Naʻe ʻalu ha fanga tokoua ʻe niʻihi ʻo talanoa mo ia, ʻo fakamatalaʻi ange ʻo pehē ʻoku nau fiemaʻu ke fakaʻataʻatā ʻa e huafa ʻo Sihová mei hano lumaʻi. ʻI he lolotonga ʻo ʻenau fetalanoaʻakí, naʻa nau tala ange kiate ia naʻa nau fetaulaki mo ha kiʻi talavou ʻi hono falé pea nau ʻoange ha tuleki kiate ia. Mei heʻenau fakamatalá, naʻe mahino ki he tokotaha faiakó ʻa e tangatá. Ko hono moʻoní, naʻá na kau ki he lotu tatau. Naʻe talanoa ʻa e tokotaha faiakó mo e kiʻi talavoú, ka naʻá ne fakaʻikaiʻi ʻa e ngaahi tukuakiʻí. Naʻe talanoa leva ʻa e tokotaha faiakó fekauʻaki mo e meʻá mo e ongo mātuʻa ʻa e kiʻi talavoú peá ne foki ki ʻapi. ʻI ha houa ʻe taha mei ai, naʻe fakafoki ange ʻe he faʻē ʻa e kiʻi talavoú ʻa e letiō naʻe kaihaʻasí.

ʻI hono ueʻi ʻe he loto-laveá, naʻe fakaofiofi atu ʻa e tokotaha faiakó ki he kulupu ʻo e kau mātuʻá pea kole fakamolemole ki he ngaahi tukuakiʻi hala kuo faí. Naʻe tali ʻe he kau mātuʻá ʻa ʻene kole fakamolemolé pea nau kole ai ʻo pehē ke ʻai ke ʻilo ʻe he kakaí ʻa e ola ʻo e fakatotoló koeʻuhí ke ʻilo ʻe he tokotaha kotoa pē naʻe tonuhia pē ʻa e Kau Fakamoʻoní. Naʻe fai ha fanongonongo ʻi he ʻapiakó, ʻo fakaʻataʻatā ai ʻa e huafa ʻo Sihová mei hono lumaʻí. ʻOku lava ai ʻe he Kau Fakamoʻoni ʻa Sihová ke hanganaki malanga tauʻatāina ʻi he feituʻú.

[Mape/Fakatātā ʻi he peesi 19]

(Ki he konga tohi kuo fokotuʻu kakató, sio ki he tohi)

ʻAFILIKA

Semipia

[Maʻuʻanga]

Mountain High Maps® Copyright © 1997 Digital Wisdom, Inc.