“Kuo Fai Lelei ʻAupito ʻa Sihova Kiate Au!”
ʻI HA efiafi mātuʻaki fakafiefia ʻi Maʻasi 1985, naʻe mamata ai ‘ʻa e kau tangata mo e kau fefine ʻi he Potungāue Faitohi ʻi he ʻuluʻi ʻapitanga ʻo e Kau Fakamoʻoni ʻa Sihová ʻi Niu ʻIoké, U.S.A., ki ha meʻa mahuʻinga. Ko e taʻu ʻaki ia ʻe 60 ʻo e ngāue ʻa Karl F. Klein ʻi he ngāue fakafaifekau taimi-kakató. Naʻe pehē ʻe Tokoua Klein, ʻi he loto-māfana: “Kuo fai lelei ʻaupito ʻa Sihova kiate au!” Naʻá ne pehē ko haʻane konga Tohitapu fakamānako ʻa e Sāme 37:4. Ki mui ai, naʻá ne fakafiefiaʻi ʻa e tokotaha kotoa ʻaki ʻene tā ʻa ʻene seló.
ʻI he taʻu ʻe 15 hono hokó, naʻe hoko atu ai ʻa Tokoua Klein ke ngāue ko ha mēmipa ʻo e kau ngāue faitohí pea ngāue ʻi he Kulupu Pule ʻa e Kau Fakamoʻoni ʻa Sihová. Pea ʻi Sanuali 3, 2001, ʻi hono taʻu 95, naʻe fakakakato loto-tōnunga ai ʻe Karl Klein ʻa hono ʻalunga fakaemāmaní.
Naʻe fāʻeleʻi ʻa Karl ʻi Siamane. Naʻe hiki ʻa hono fāmilí ki he ʻIunaite Seteté, pea naʻe tupu hake ʻa Karl ʻi ha kolo ʻuta ʻo Chicago, Illinois. Lolotonga ʻene kei siʻí ko Karl fakatouʻosi mo hono tehina ko Ted naʻá na hoko ai ʻo mahuʻingaʻia lahi ʻi he Tohitapú. Naʻe papitaiso ʻa Karl ʻi he 1918, pea ko e ngaahi meʻa fakafiefia naʻá ne fanongoa ʻi ha fakataha-lahi ʻa e Kau Ako Tohitapú ʻi he 1922 naʻe langaʻi ai ʻiate ia ha manako tuʻuloa ki he ngāue fakamalangá. Naʻe ʻikai te ne loto ke fakalaka ha uike ʻoku ʻikai te ne kau ʻi he ngāue fakamalangá, ʻo fai pehē naʻa mo e ʻi he ngaahi uike fakaʻosi ʻo ʻene moʻuí.
Naʻe hoko ʻa Karl ko ha mēmipa ʻo e kau ngāue ʻi he ʻuluʻi ʻapitangá ʻi he 1925, ʻo ne ʻuluaki ngāue ʻi he faiʻanga pulusí. Naʻá ne manako moʻoni ʻi he mūsiká, pea ʻi ha ngaahi taʻu, naʻá ne tā ai ʻa e seló ʻi ha kulupu tā meʻalea ʻa ia naʻe fakamafola ʻi he ngaahi letiō faka-Kalisitiané. Hili iá, naʻá ne ngāue ʻi he Potungāue Ngāué, ʻo ne fiefia tautefito ʻi heʻene feohi mo hono ʻovasiá, ko T. J. Sullivan. Lolotonga e taimi ko iá, naʻe mali ʻa Ted pea ko ia mo hono uaifí, ko Doris, naʻá na ngāue fakamisinale ʻi Pueto Liko.
ʻI ha vaeuaʻi senituli, naʻe ngāue ai ʻa Karl Klein ʻi he Potungāue Faitohí, ʻa ia naʻá ne fai ai ha tokoni tuʻu-ki-muʻa koeʻuhi he naʻá ne manako ʻi he fai ʻo e fekumí pea naʻá ne maʻu ha ʻilo loloto fekauʻaki mo e Tohitapú. ʻI he 1963, naʻe mali ai ʻa Karl mo Margareta, ko ha misinale Siamane ʻa ia naʻe ngāue ʻi Polivia. ʻI heʻene poupou anga-ʻofá, tautefito ʻi heʻene hokosia ha ngaahi palopalema fakaemoʻuileleí, naʻá ne malava ai ke ʻomai ʻa e fua lahi ʻi ha taimi fuoloa ʻo fakalaka ia ʻi he taʻumotuʻa ʻa ia ʻoku mālōlō ai ʻa e tokolahi tahá mei he ngāué. Ko e natula faitotonu ʻa Karl, fakataha mo ʻene manako mūsiká, naʻe tokoni ia ki he ngaahi malanga ʻoku taau ke manatuʻi ʻi he ngaahi fakatahaʻangá pea ʻi he ngaahi fakataha-lahí. ʻIkai fuoloa peá ne maté, naʻá ne tataki ha lāulea ʻi he konga tohi he pongipongí maʻá e fuʻu fāmili Pēteli ʻi Niu ʻIoké, ke fiefia mo maʻu ʻaonga ai ʻa e tokotaha kotoa.
Ko e kau lautohi tuʻumaʻu tokolahi ʻo e Watchtower te nau manatuʻi ʻa e talanoa ki he moʻuí ʻa Tokoua Klein, ko ha fakamatala fakamānako fekauʻaki mo e ngaahi meʻa naʻá ne hokosiá ʻa ia naʻe pulusi ʻi he ʻīsiu ʻo ʻOkatopa 1, 1984. Te ke fiefia ʻi hono lau pe toe lau ʻa e fakamatala ko iá, ʻo manatuʻi naʻe fakamoleki ʻe he tokotaha-tohí ha toe taʻu ʻe hongofulu mo e konga kehe ʻi he tuʻunga ko ha Kalisitiane loto-tōnunga mo līʻoa.
ʻI he tuʻunga ko e taha ʻo e kau pani ʻa e ʻEikí, naʻe holi ʻa Tokoua Klein ʻaki ʻa e kotoa ʻo hono lotó ke pule fakataha mo Kalaisi ʻi hēvani. ʻOku tau maʻu ʻa e ʻuhinga kotoa ke tui ai kuo fakahoko ʻe Sihova he taimí ni ʻa e holi ko iá.—Luke 22:28-30.
[Fakatātā ʻi he peesi 31]
Ko Karl ʻi he 1943 fakataha mo T. J. Sullivan mo Ted pea mo Doris
[Fakatātā ʻi he peesi 31]
Ko Karl mo Margareta, ʻi ʻOkatopa 2000