‘Fakamālō ki he Kau Fakamoʻoni ʻa Sihová Koeʻuhi ko e Tauʻatāina Fakalotú’
“KI MUʻA ke ke tāpuniʻi ʻa e matapaá ki ha tokotaha Fakamoʻoni ʻa Sihova,” ko e lau ia ʻa ha kupu ʻi he nusipepa USA Today, “kiʻi tuʻu hifo ʻo fakakaukau ki he fakatanga fakamā naʻa nau fuesia ʻikai fuʻu fuoloa ʻi he kuohilí, pea pehē ki he fuʻu tokoni kāfakafa kuo nau fai ki he ngaahi tauʻatāina ʻi he ʻUluaki Fakatonutonú ʻoku tau fiefia kotoa aí.” Naʻe fakatangaʻi ʻa e Kau Fakamoʻoni ʻa Sihová ʻi he ʻIunaite Seteté he kotoa ʻo e 1940 tupú koeʻuhi ʻi he lotolotonga ʻo e ngaahi meʻa kehé, naʻa nau fakafisi ke salute ki he fuká.—Ekisoto 20:4, 5.
Ko e ngaahi keisi nai ʻe 30 fekauʻaki mo e Kau Fakamoʻoni ʻa Sihová naʻe haʻu ia ki he Fakamaauʻanga Lahi ʻa e U.S. ʻi he vahaʻa taimi taʻu ʻe nima he vahaʻa ʻo e 1938 mo e 1943. ʻOku pehē ʻe he kupú: “Naʻe faʻa toutou ʻohake ʻe he Kau Fakamoʻoni ʻa Sihová ʻa e ngaahi ʻīsiu tefito ki he ʻUluaki Fakatonutonú ʻo tohi ai ʻe Fakamaau Harlan Fiske Stone, ‘Ko e Kau Fakamoʻoni ʻa Sihová ʻoku totonu ke nau maʻu ha tokoni fakapaʻanga ʻi he vakai atu ki he tokoni ʻoku nau fai ʻi hono solova ʻa e ngaahi palopalema fakalao ki he ngaahi tauʻatāina ʻa e tangataʻifonuá.’”
Ko ia ai, ʻi he ofi ki hono fakamulitukú ʻoku pehē ʻe he kupú: “Ko e ngaahi lotu kotoa pē ʻoku totonu ke nau fakamālō ki he Kau Fakamoʻoni ʻa Sihová koeʻuhi ko hono fakalahi ʻo e tauʻatāina [fakalotú].”
[Maʻuʻanga ʻo e Tā ʻi he peesi 32]
Fale ʻi muí: Photo by Josh Mathes, Collection of the Supreme Court of the United States; toʻohema ki laló, kau fakamaau: Collection of the Supreme Court of the United States