ʻI he Taimi ʻe Taha Naʻá Ma Hoko Ai ko e Ongo Ulofi—ʻI he Taimi Ní ʻOkú Ma Hoko ko e Ongo Sipi!
ʻI he taimi naʻá ku kei siʻi ai mo Sakina ko ha ongo kiʻi tamaiki fefiné, naʻá ma kaungāʻapi. Naʻe fuʻu lahi mo kaukaua ʻa Sakina, ka naʻá ku siʻisiʻi au mo tutue. Naʻá ma faʻa fakakikihi, ka ʻi he ʻaho ʻe taha naʻá ma fepaki ai. Mei he ʻaho ko iá ʻo faai mai, ne ʻikai te ma toe feleaʻaki pe fefakaleaʻaki. Naʻe faifai atu pē, ʻo ma fakatou hiki pea ma fepulingaki ai.
ʻI he 1994, naʻá ku kamata ke ako ai ʻa e Tohitapú mo e Kau Fakamoʻoni ʻa Sihová, pea faifai mai pē ʻo liliu ai hoku ʻulungāngá. ʻI he taʻu ʻe fā mei ai lolotonga ʻeku maʻu ʻemau ʻaho ʻasemipilī makehe ʻi Bujumbura, Pulunitī, naʻá ku ʻohovale ʻi heʻeku fetaulaki ai mo Sakina. Naʻá ku fiefia ʻi heʻene ʻi aí, ka ko ʻema fefakaleaʻakí naʻe hangē ʻoku momokó. Ki mui ʻi he ʻaho ko iá, naʻá ku fuʻu ʻohovale ʻi heʻeku fakatokangaʻi atu ia ʻi he lotolotonga ʻo e kau teu papitaisó! Naʻe liliu lahi mo ia foki. Naʻe ʻikai te ne kei hoko ko e tokotaha vēkeveke ke fuhu ʻa ē naʻá ku faʻa kē mo iá. He fakaofo ē ke sio ki heʻene ʻomai ʻa e fakamoʻoni fakahāhā ʻo ʻene fakatapui ki he ʻOtuá ʻaki ʻene fakamoʻulaloa ki he papitaiso ʻi he vaí!
ʻI heʻene ʻalu hake mei he vaí, naʻá ku fakavave atu ʻo fāʻofua ʻiate ia mo fafana ange ʻi hono telingá: “ʻOkú ke manatuʻi ʻa ʻeta faʻa fuhú?” “ʻIo,” ko ʻene leá ia, “ʻOku ou manatuʻi, ka ko e meʻa ia ʻi he kuohilí. Ko ha tokotaha foʻou au he taimí ni.”
Ko kimaua fakatouʻosi ʻokú ma fiefia ʻi heʻema maʻu ʻa e moʻoni ʻo e Tohitapú ʻa ia ʻokú ne fakafāʻūtahaʻi mo liliu ai ʻa homa ngaahi ʻulungaanga hangē ha ulofí ki he ngaahi ʻulungaanga ʻo e fanga sipi ʻoku ʻa e Tauhi-Sipi Lahi, ko Sihova ko e ʻOtuá. Ko e moʻoni, ʻoku liliu ʻe he moʻoni ʻo e Tohitapú ʻa e moʻuí.