“Kuó U Toki ʻIlo ʻa Hoku Palopalemá!”

KO E anga ia ʻo e ongoʻi ʻa ha tangata ʻi Tōkiō ʻi he taimi naʻá ne lau ai ʻa e talanoa ki he moʻuí ʻi he ʻīsiu ʻo e Taua Leʻo ʻo Tīsema 1, 2000. Naʻe fakakaveinga ʻa e kupú “ʻOku ʻIkai Te Ke ʻIloʻi Pe ʻE Fēfē ʻa Hoʻo Moʻuí ʻApongipongi,” pea naʻe lave ai ki he meʻa naʻe hokosia ʻe ha misinale ki muʻa, ʻa ia naʻá ne tofanga ʻi he mahaki ʻoku ʻiloa fakafaitoʻo ko e ʻāvanga femaleleaki.

Naʻe pehē ʻe he tangata mei Tōkioó ʻi ha tohi naʻe fakatuʻasila ki he kau faipulusi ʻo e makasini ko ʻení: “Ko e ngaahi fakaʻilonga naʻe fakamatalaʻí naʻe kaunga tofu pē kiate au. Ko ia, naʻá ku ʻalu ki ha falemahaki ki he ʻatamaí peá u ʻiloʻi ai ʻoku ou maʻu ʻa e ʻāvanga femaleleakí. Naʻe ʻohovale ʻa e toketā naʻá ne sivi aú. Naʻá ne pehē, ‘Ko e kakai ʻoku nau maʻu ʻa e mahaki ko ʻení ʻoku tātātaha ke nau fakakaukau ʻoku nau puke.’ Naʻe tokoniʻi au ke u ʻilo ʻa e mahakí ki muʻa ke hoko ʻo lahí.”

ʻOku maʻu ʻe he laui miliona ʻo e kakai takatakai he māmaní ʻa e ʻaonga ʻi ha ngaahi founga kehekehe mei hono lau ʻa e ʻīsiu taki taha ʻo e Taua Leʻo pea mo hono hoá, ʻa ia ko e ʻĀ Hake! ʻOku nau ʻilo ʻoku fakatupu-ʻilo mo fakafiemālie ʻa e ngaahi kupú. ʻOku pulusi he taimí ni ʻa e makasini Taua Leʻo ʻi he lea ʻe 141, pea ʻoku pulusi ʻa e ʻĀ Hake! ʻi he lea ʻe 86. Te ke fiefia mo koe foki ʻi hono lau maʻu pē ʻa e Taua Leʻo mo e ʻĀ Hake!