Ko e Hā ʻa e Mahuʻinga ʻo ha Konisēnisi Maʻa?
“TUʻUTUʻUNIʻI ʻa e Puleʻangá Ke Ne Tali ʻa e R$20,000.” Ko e ʻuluʻi fakamatala ngalikehe ko ení naʻe hā ia ki muí ni ʻi he nusipepa Pelēsila ko e Correio do Povo. Naʻe fakamatala ʻa e kupú ki he talanoa fekauʻaki mo Luiz Alvo de Araújo, ko ha tangata tufa meili fakalotofonua, ʻa ia naʻá ne fakatau atu ha konga kelekele ki he puleʻanga fakasiteití. Hili ʻene fakamoʻoni hingoa ki hono foaki ʻo ʻene koloá, naʻe ʻohovale ʻa Luiz ʻi hono ʻiloʻi kuo totongi ange kiate ia ʻo lahi ʻaki ʻa e R$20,000 (fakafuofua ko e $8,000, U.S.) ʻi he totongi naʻe fai ki ai ʻa e felotoí!
Ko hono fakafoki ʻa e totongi ʻová naʻe ʻikai faingofua ke fai. Hili ha ngaahi ʻaʻahi taʻelavameʻa ki he ngaahi potungāue ʻa e puleʻangá, naʻe fakahinohino ai ʻa Luiz ke ne totongi ha loea pea fakaleleiʻi ʻa e palopalemá ʻi he fakamaauʻangá. “ʻOku hā mahino naʻe fai ʻe ha taha ha fehālaaki, pea koeʻuhi ko e fihi lahi ʻa e foungá, naʻe ʻikai ke ʻilo ʻe ha taha ʻa e founga ke solova ai ʻa e tuʻungá,” ko e lau ia ʻa e fakamaau ʻa ia naʻá ne tuʻutuʻuniʻi ʻa e puleʻangá ke ne tali ʻa e paʻangá pea totongi ʻa e ngaahi fakamole fakalaó. “Ko e fuofua keisi ia ʻi he faʻahinga ko ení kuo faifai ange peá u mātā.”
Ko Luiz, ko e taha ʻo e Kau Fakamoʻoni ʻa Sihová, ʻokú ne fakamatala: “ʻE ʻikai fakaʻatā au ʻe hoku konisēnisi kuo akoʻi ʻe he Tohitapú ke u tauhi ʻa e meʻa naʻe ʻikai ʻaʻaku totonu. Naʻe pau ke u feinga ke fakafoki ʻa e paʻangá.”
ʻE vakai ʻa e tokolahi ʻoku ngalikehe ha fakakaukau pehē pe aʻu ʻo faingataʻa ke mahinoʻi. Ka ʻoku fakahaaʻi ʻe he Folofola ʻa e ʻOtuá ko e kau Kalisitiane moʻoní ʻoku nau fakamahuʻingaʻi māʻolunga ʻa hono tauhi maʻu ha konisēnisi maʻa ʻi heʻenau feangainga mo e ngaahi tuʻunga mafai fakamāmaní. (Loma 13:5) ʻOku fakapapauʻi ʻe he Kau Fakamoʻoni ʻa Sihová ke tauhi maʻu ha ‘konisēnisi faitotonu pea ke nau faitotonu ʻi he meʻa kotoa pē.’—Hepelu 13:18, NW.