Fiefia ʻi Heʻenau Ako ke Lautohí!
ʻI HE ngaahi konga ʻe niʻihi ʻo e ʻOtu Motu Solomoné, ʻoku aʻu ki he peseti ʻe 80 ʻo e faʻahinga ʻoku nau hoko he taimí ni ko e Kau Fakamoʻoni ʻa Sihová naʻe pau ke nau fāinga mo e taʻemalava ke lautohí. Ko e meʻá ni kuo ʻikai ke ngata pē ʻi heʻene fakangatangata ʻenau kau ʻi he ngaahi fakataha fakauike ʻa e fakatahaʻangá ka kuo toe ʻai ai ke faingataʻa ange kia kinautolu ke akoʻi ʻa e ngaahi moʻoni ʻo e Puleʻangá ki he niʻihi kehé. ʻOku malava moʻoni ki he kakai lalahi kuo ʻikai ʻaupito aʻu ʻo nau puke ha peni vahevahé ke nau lautohi?
Ko e polosiua Apply Yourself to Reading and Writing, ʻa ia naʻe pulusi ʻe he Kau Fakamoʻoni ʻa Sihová, kuo ngāueʻaki ia ʻi ha ngaahi kalasi lautohi ʻi he meimei fakatahaʻanga kotoa pē ʻa e Kau Fakamoʻoni ʻa Sihova ʻi he kotoa ʻo e ʻOtu Motu Solomoné. ʻOku fakatātaaʻi ʻe he ngaahi meʻa naʻe hokosia ko ení ʻa e anga ʻo hono tokoniʻi ʻa e laui teau ki ha tuʻunga fakaemalava foʻou fakafou ʻi he polokalamá ni. Ko e mahuʻinga angé, ko e ako ke lautohí kuo ʻai ai ke nau lava ʻo fai ha fakamoʻoni lelei ange ʻo fekauʻaki mo ʻenau tuí.—1 Pita 3:15.
Ko ha misinale ʻa ia naʻe vaheʻi ki ha fakatahaʻanga ʻoku laka hake ai he teaú ʻa e kau malanga ʻo e Puleʻangá naʻá ne fakatokangaʻi, ʻi he ako Tohitapu fakauike ʻoku ngāueʻaki ai ʻa e Taua Leʻo, ko e tokosiʻi pē naʻa nau maʻu haʻanau tatau ʻo e makasiní pea naʻe toe tokosiʻi ange ʻa e faʻahinga naʻe talí. Ko e ʻuhingá? Ko e ʻikai lava ke lautohí. ʻI he taimi naʻe fanongonongo ai ʻe he fakatahaʻangá ʻa hono fokotuʻu ha ako ke akoʻi ai ʻa e lautohí mo e tohí, naʻe pole fiefia ai ʻa e misinalé ke hoko ko ha faiako. ʻI he ʻuluaki taimí, ko ha kau ako tokosiʻi pē naʻe haʻú, ka naʻe ʻikai fuoloa kuo kamata ke kau mai ki ai ha kakai laka hake ʻi he toko 40 ʻo e ngaahi taʻumotuʻa kotoa pē.
Ko e hā ʻa e olá? ʻOku fakamatala ʻa e misinalé: “ʻI ha taimi nounou mei he kamata ʻa e kalasi lautohí, naʻá ku ʻalu ai ki he māketí ʻi he ono pongipongí ke fakatau mai ha meʻakai ki he ʻapi misinalé. Naʻá ku sio ai ki he niʻihi ʻo e kau akó, naʻa mo e fānau iiki ʻaupitó, ʻoku nau fakamāketi niu mo e vesitapolo. Ko e hā hono ʻuhingá? Koeʻuhí he naʻa nau loto ke maʻu ha paʻanga feʻunga ke fakatau mai ʻaki ha peni mo ha pepa ke nau ngāueʻaki ʻi he kalasi lautohí! Pehē foki, ko hono maʻu ʻa e kalasi ko iá ko hano ueʻi ia ke maʻu ha tatau fakafoʻituitui ʻo e makasini Taua Leʻo.” ʻOkú ne tānaki mai: “ʻI he taimí ni, lolotonga ʻa e Ako Taua Leʻo ʻa e fakatahaʻangá, ʻoku kau ki ai ʻo tatau pē ʻa e kei siʻi mo e taʻumotuʻa pea ʻoku longomoʻui ʻa ʻemau fetalanoaʻakí.” Naʻe tautefito ʻa e fiefia ʻa e misinale ko ení ʻi he taimi naʻe kole ai ʻe ha mēmipa ʻe toko fā ʻo e kalasí pe ʻe lava ke nau kau ʻi he ngāue fakamalanga maʻá e kakaí koeʻuhi ʻo hangē ko ʻenau fakaleá, naʻe ʻikai te nau “toe ilifia.”
Ko e ngaahi ola lelei kuo hoko ki he kau ako ʻi he ngaahi kalasi lautohí kuo fakalaka mamaʻo atu ia ʻi he ako pē ke lautohi mo tohí. Ko e fakatātaá, ʻi he laui taʻu lahi ko e uaifi taʻetui ʻo ha Fakamoʻoni ʻe taha naʻe hoko ia ko ha fakahohaʻaʻanga ki he fakatahaʻangá. Naʻá ne tolomakaʻi ʻa e kakaí ʻi he fanga kiʻi meʻa fakatupuʻita valevale tahá pea aʻu ʻo ʻohofi ʻa e kakai fefine kehé ʻaki ha konga papa. ʻI heʻene maʻu ʻi ha ngaahi taimi ʻa e ngaahi fakataha faka-Kalisitiané mo hono husepānití, naʻá ne fuaʻa lahi ʻaupito ʻiate ia ʻo hanga ai ʻa e husepānití ki hono tui ha matasioʻata fakapōpōʻuli koeʻuhi ke ʻoua naʻa lava ke ne tukuakiʻi ia ki he sio ki he kakai fefine kehé.
Kae kehe, taimi nounou mei he kamata ʻa e ngaahi kalasi lautohí, naʻe ʻeke fakaoloolo ʻe he fefiné ni: “ʻE lava ke u kau ʻi he kalasí?” Ko e talí naʻe ʻio. Mei ai ʻo faai mai naʻe ʻikai ʻaupito te ne liʻaki ha foʻi kalasi pe ko ha fakataha ʻa e fakatahaʻangá. Naʻá ne ngāue mālohi ki heʻene ngaahi lēsoni lautohí pea fai mo e fakalakalaka fakaofo, ʻa ia naʻe ʻai ai ia ke ne fiefia ʻaupito. Ko ʻene kole hokó leva: “ʻE lava ke u ako Tohitapu?” Naʻe kamata fiefia ʻa hono husepānití ke ako mo ia, pea ʻoku hokohoko atu ʻa ʻene laka ki muʻá ʻi heʻene malava ke lautohi mo tohí pea ʻi heʻene ʻiloʻi ʻa e Tohitapú.
Ki ha taʻu 50 ʻa ia kuo ʻikai ʻaupito te ne ala ki ha peni vahevahe, ke puke pē ha peni pea ke tohiʻi ʻa e ngaahi foʻi mataʻitohi ʻo e ʻalafapetí ʻe lava ke hoko ia ko ha fakafaingataʻaʻiaʻanga lahi. Kuo hoko ʻo fā ʻa e louhiʻi nima ʻo e niʻihi mei he mālohi ʻoku nau ngāueʻaki ki he peni vahevahé mo e pepá lolotonga ʻa e muʻaki ngaahi tuʻunga ʻo e akó. Hili ha ngaahi uike ʻo e fāinga ke puke mo puleʻi ʻa e peni vahevahé, ʻoku fakahaaʻi mālohi ʻe he kau ako ʻe niʻihi ʻi he kata lahi: “ʻOku malava ke u ʻunuaki maʻamaʻa ʻa hoku nimá ʻi he pepá!” Ko e sio ki he fakalakalaka ʻa e kau akó ʻoku toe ʻai ai ke fiefia ʻa e kau faiakó. Naʻe pehē ʻe ha faiako ʻe taha: “Ko hono akoʻi ʻo ha kalasi ko ha meʻa fakafiefia lahi, pea ko e houngaʻia moʻoni ʻa e kau akó ʻi he tokonaki ko eni meia Sihová ʻoku faʻa fakahaaʻi ia ʻaki ʻa e pasipasi ʻi he hili ha kalasi.”
Fakataha mo e kau misinalé, ko e Kau Fakamoʻoni kuo lautohi ko ení ʻoku nau fiefia. Ko e hā hono ʻuhingá? Koeʻuhi ʻoku lava he taimí ni ke nau ngāueʻaki ʻenau malava ke lautohi mo tohí ke fakalāngilangiʻi ai ʻa Sihova.
[Fakatātā ʻi he peesi 8, 9]
Fakatouʻosi ʻa e kei siʻí mo e taʻumotuʻá ʻoku nau fakahoungaʻi ʻa e ngaahi kalasi lautohí