“Naʻe ʻIkai Te U ʻIlo Lahi Fekauʻaki mo e ʻOtuá”

“ʻI HE taʻu kuohilí, ne ʻaʻahi mai ai ʻa e Kau Fakamoʻoni ʻa Sihová ʻo vahevahe kiate au ʻa e ongoongo fakaofo fekauʻaki mo e Puleʻanga ʻo e ʻOtuá. Ko ha Katolika au ʻo feʻunga mo e taʻu ʻe valu, ka naʻe ʻikai te u ʻilo lahi fekauʻaki mo e ʻOtuá. ʻI he foʻi taʻu pē ko eni ʻe tahá, kuó u ako ai ha meʻa lahi,” ko e tohi ia ʻa ha tangata ʻoku nofo ʻi Kerala, ʻInitia. “ʻOku ou fiefia ʻaupito ke ʻiloʻi ko e Taua Leʻo ʻoku pulusi ia ʻi he lea ʻe 139 [146 he taimí ni],” ko ʻene hokó atu ia. “ʻOku fakaofo ʻa e hoko ʻa e kakai ʻo e ngaahi kulupu lea kotoa pē ʻo ʻiloʻi ʻa e pōpoaki ʻo fekauʻaki mo e ʻOtuá.”

Neongo ʻoku taukaveʻi ʻe he kau filōsefa tokolahi ʻoku faingataʻa ke ʻiloʻi ʻa e ʻOtuá, naʻe fakamahinoʻi ʻe he ʻapositolo ko Paulá ʻoku malava eni. ʻI heʻene lea ki ha kulupu ʻo e kau ʻAtenisí, ko e niʻihi ai naʻa nau lotu ʻi ha ʻōlita naʻe fakatapui ki ha “ʻOtua Teʻeki ʻIloa,” naʻe pehē ʻe Paula: “Ko e meʻa ʻoku mou lotu taʻe ʻilo ki ai, ko eni ia ʻoku ou fakaha ni kiate kimoutolu. Ko e ʻOtua naʻa ne ngaohi ʻa e univesi, mo e meʻa kehekehe ʻoku ʻi ai, . . . ʻa ia ʻoku aʻana ʻa e foaki mai kiate kitautolu fulipe ʻa e moʻui, mo e manava, mo e meʻa kotoa pe! Naʻa ne oʻi foki ʻa e ngaahi faʻahinga kakai ʻa ia ʻoku nau tupunga taha kotoa pe, ke nau nofoʻia ʻa e funga kotoa ʻo mamani.”—Ngāue 17:​23-26.

Naʻe ekinaki ʻa Paula ki heʻene kau fanongó ke nau kumi ke ʻiloʻi ʻa e Tokotaha-Fakatupú, he “talāʻehai ʻoku ne mamaʻo mei hatau toko taha.” (Ngāue 17:27) ʻE fiefia ʻa e Kau Fakamoʻoni ʻa Sihová ke tokoniʻi koe ke ke hoko ʻo ʻiloʻi ʻa e ʻOtua moʻoní mo hono ngaahi ʻulungaanga fakamānakó.