“Naʻá Ku Maʻu Ai ʻa e Meʻa Kotoa Naʻá Ku Fiemaʻú”
KO E loto-mafasiá, fakatatau ki ha līpooti ʻa e Kautaha Moʻui ʻa Māmaní, ʻoku lolotonga fakafuofua ʻokú ne uesia ʻa e kakai laka hake he toko 120 milioná ʻi māmani lahi. ʻI he taʻu taki taha, ʻoku fai ai ʻe he kakai ʻe toko taha miliona ʻa e taonakitá pea ko e vahaʻa ʻo e toko 10 mo e 20 miliona ʻoku nau feinga ke fakangata ʻenau moʻuí. Ko e hā ʻa e tokoni ʻoku ʻi ai ki he faʻahinga ʻoku nau tofanga ʻi he loto-mafasiá? ʻE fakasiʻisiʻi nai ʻe he founga fakafaitoʻó ʻa e faingataʻá, pea ʻoku mātuʻaki mahuʻinga ʻa e poupou fakaeongó. ʻIkai ngata aí, ko e niʻihi kuo nau hokosia ʻa e ngaahi ongoʻi peheé kuo nau maʻu ʻa e tokoni lahi ʻi he ʻū tohi makatuʻunga faka-Tohitapu ʻaonga ʻa e Kau Fakamoʻoni ʻa Sihová, hangē ko ia ʻoku fakahaaʻi ʻi he tohi hono hoko mei Falaniseé.
“ʻIkai fuʻu fuoloa atu, naʻe ʻikai lava ke u sio ki he taumuʻa ke hokohoko atu ʻa e moʻuí. Naʻá ku lotu ki he ʻOtuá ke tuku au ke u mate. Ne hangē ia kuó u mate ʻi lotó. ʻI he kumi fakahinohinó, naʻá ku lotu lahi kia Sihova. Naʻá ku toe fili ke lau ʻa e 2002 Yearbook of Jehovah’s Witnesses pea ʻosiki ia ʻi he ʻaho ʻe tolu. Kuo pau ke u leaʻaki naʻá ne fakalototoʻaʻi lahi ʻaupito au pea ʻai ke mālohi ʻeku tuí.
“Naʻá ku fai ha fekumi ʻi he ngaahi makasini Taua Leʻo mo e ʻĀ Hake!, pea ko ha ʻohovale ē ka ko au! Kuó u lau tuʻumaʻu ʻa e ngaahi makasini ko ení ʻo laka hake he taʻu ʻe 15, ka naʻe ʻikai te u ʻiloʻi ʻa e anga ʻo e fakalototoʻa mo e fakaueʻiloto ʻa e ngaahi kupú. ʻOku nau fonu ʻi he ʻofá—ko ha ʻulungaanga ʻoku mātuʻaki tātātaha ʻi he ngaahi ʻahó ni. Naʻá ku maʻu ai ʻa e meʻa kotoa naʻá ku fiemaʻú.”
ʻOku pehē ʻe he Tohitapú: “Ko e loto lavea ʻoku ofi ki ai ʻa e ʻEiki, pea ʻoku ne fakamoʻui ʻakinautolu ʻoku laumalie mafesi.” (Sāme 34:18) ʻI he ʻikai ha veiveiuá, ko e faʻahinga kotoa ʻoku “loto lavea” pe “laumalie mafesi” ʻe lava ke nau maʻu ʻa e fakalototoʻa mo ha ʻamanaki ki he kahaʻú ʻi he Tohitapú. ʻOku tufaki ʻe he Kau Fakamoʻoni ʻa Sihová ʻa e ʻū tohi makatuʻunga faka-Tohitapu ke tokoniʻiʻaki ʻa e faʻahinga ʻoku faingataʻaʻiá ke nau maʻu ʻaonga mei he matavai fakamānavaʻi fakaʻotua ko ia ʻo e fakafiemālié.