ʻOku Fakaafeʻi Loto-Māfana Koe

KO E ʻOhomohe Fakaʻosí, ʻa ia naʻe fokotuʻu ʻe he ʻEiki ko Sīsū Kalaisí ʻi he taʻu nai ʻe 2,000 kuohilí, ʻoku ʻikai ko ha meʻa mahuʻinga fakahisitōlia pē ia naʻe hoko. ʻOku ʻi ai hono kaunga mālohi ki he kakaí talu pē mei hono kamatá. ʻI he ueʻi ʻe he meʻa ʻoku nau lau ʻi he ngaahi fakamatala Kōsipelí ʻo fekauʻaki mo e meʻa naʻe hoko ʻi he pō ko iá, kuo feinga ai ʻa e tokolahi ke fakamanatu ʻa e ʻOhomohe ʻa e ʻEikí ʻi he ngaahi founga kehekehe.

Ko e meʻá ni kotoa ʻoku mahinongofua ia, koeʻuhí he naʻe fekauʻi ʻe Sīsū Kalaisi tonu ke kātoangaʻi ʻe hono kau muimuí ʻa e meʻa ko eni ne hokó pea ʻoku nau fai tuʻumaʻu ia. Naʻá ne tala fakahangatonu kia kinautolu: “Mou fai ʻeni mōku fakamanatu.”—Luke 22:19; 1 Kolinito 11:​23-25.

Ko e moʻoni, ke hoko ʻa e fakamanatú ko ha meʻa fakafiemālie moʻoni ia ʻoku hokosia, kuo pau ke te maʻu ʻa e mahinoʻi totonu ʻo hono ʻuhingá, hangē ko ia ʻoku ʻomai ʻe he Folofola ʻa e ʻOtuá, ko e Tohitapú. Tānaki atu ki ai, ʻoku mahuʻinga ke ʻiloʻi ʻa e meʻa ʻoku leaʻaki ʻe he Tohitapú fekauʻaki mo e taimi pea mo e founga ke kātoangaʻi ai ʻa e meʻa ko ení.

ʻI he talangofua ki he fekau ʻa Sīsuú, ko e Kau Fakamoʻoni ʻa Sihova takatakai ʻi he māmaní te nau fakatahataha fakataha ʻi he efiafi Pulelulu, ʻEpeleli 16, 2003 ke fakamanatu ʻa e pekia ʻa Sīsuú. Ko ha taimi ia ke sivisiviʻi ai ʻa e ngaahi Konga Tohitapú pea ke fakafoʻou ʻenau tui mo e ʻofa ki he ʻEiki ko Sīsū Kalaisí, ʻa ia naʻá ne pehē: “Naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.” (Sione 3:16) ʻOku fakaafeʻi loto-māfana koe ke ke fakatahataha mo kinautolu ʻi he efiafi ko iá koeʻuhi ke lava ʻo fakaivimālohiʻi ai mo hoʻo tuí foki mo hoʻo ʻofa kia Sīsū Kalaisi pea mo e Tamai Fakahēvaní, ʻa Sihova ko e ʻOtuá.