ʻOkú Ke Manatuʻi?

Kuó ke houngaʻia ʻi hono lau ʻa e ngaahi ʻīsiu fakamuimui ʻo e Taua Leʻo? Sai, sio angé pe ʻe lava ke ke tali ʻa e ngaahi fehuʻi ko ení:

• ʻOku lava fēfē ke tau maʻu ʻaonga mei he ako fekauʻaki mo e fāmili ʻo Sāfaní?

Ko Sāfaní ko ha tokotaha hiki-tatau ia mo e sekelitali ʻa Tuʻi Siosaia ʻo Siutá. ʻI he tuʻunga ko ha tangata ʻiloa ia ʻi he puleʻangá, naʻe poupouʻi ʻe Sāfani ʻa e feingangāue ʻa e tuʻí ke toe fakafoki ʻa e lotu moʻoní. Ko e toko ua ʻo e ngaahi foha ʻo Sāfaní naʻá na mateaki ki he palōfita ko Selemaiá. Pea ko e toe foha ʻe taha mo e mokopuna ʻe toko ua naʻa nau ngāueʻaki tatau honau tuʻunga ʻiloá maʻá e lotu moʻoní. ʻI he tuʻunga meimei tatau, ʻoku totonu ke tau ngāueʻaki ʻetau koloá mo e tuʻunga ʻiloá ke pouaki ʻa e lotu moʻoní.​—12/15, peesi 19-​22.

• Kuo anga-fēfē hono ikuʻi ʻe Irene Hochstenbach ha faingataʻaʻia lahi fakaesino pea malava ke tauhi kia Sihová?

ʻI heʻene taʻu fitú, naʻe mole ai ʻene fanongó. Neongo ʻa ʻene tulí, naʻá ne ako ke fetuʻutaki mo e niʻihi kehé pea ʻokú ne fononga he taimí ni mo hono husepānití (ko ha ʻovasia fefonongaʻaki) ʻi heʻene ngāue ʻi he ngaahi fakatahaʻanga ʻi Netalení.​—1/1, peesi 23-6.

• Ko e hā ʻa e ongo tokoni ako foʻou ʻe ua naʻe tukuange mai ʻi he ngaahi Fakataha-Lahi Fakavahe “Kau Fanongonongo Faivelenga ʻo e Puleʻangá”?

Naʻe fiefia ʻa e kau Kalisitiane takatakai ʻi he foʻi kolopé ke maʻu ʻa e Lotu ki he ʻOtua Moʻoni Pē Tahá, ʻa ia ʻoku faʻufaʻu ia ke ako mo e faʻahinga foʻoú hili ʻenau fakakakato ʻenau ako ʻo e tohi ʻIlo ʻA Ia ʻOku Taki Atu ki he Moʻui Taʻengatá; ko e tohi foʻou ʻe tahá ko e Draw Close to Jehovah, ʻa ia ʻoku fakahangataha ia ki he ngaahi ʻulungaanga mo e ngaahi feangainga ʻa Sihová. ʻOku toe fakahaaʻi ai ʻa e founga ʻe lava ke tau faʻifaʻitaki ai kiate ia ʻi hono fakahāhā ʻa hono ngaahi ʻulungāngá.​—1/15, peesi 23-4.

• Ko e hā ʻa e ʻuhinga ʻo e Palovepi 12:5: “Ko e ngaahi fakakaukau ʻa e faitotonu ʻoku hoa mo e lao [“fakamāú,” NW]”?

Ko e ngaahi fakakaukau tonu ʻa e kakai leleí ʻoku lelei fakaeʻulungaanga pea ʻoku fakahanga ia ki he meʻa ʻoku lelei mo totonú. Koeʻuhi ko e faʻahinga māʻoniʻoní ʻoku ueʻi kinautolu ʻe he ʻofa ki he ʻOtuá pea ki he kaungā faʻahinga ʻo e tangatá, ʻoku lelei ʻenau ngaahi taumuʻá.​—1/15, peesi 30.

• Ko e hā ʻe lava ke ne tokoniʻi ha tokotaha ke ne fakatupulekina ha vakai mafamafatatau ki he ngāué?

ʻOku ʻaonga ke akoʻi mei he kei siʻí ke fakamahuʻingaʻi ʻa e ngāué. ʻOku enginaki mai ʻa e Tohitapú kia kitautolu ke maʻu ha tōʻonga ngāue lelei, ʻo fakaʻehiʻehi mei he fakapikopikó. (Palovepi 20:4) ʻOkú ne toe fakalototoʻaʻi ʻa e kau Kalisitiané ke ʻoua te nau hoko ʻo nōfoʻi ʻi he ngāué. ʻOku totonu ke tau ʻiloʻi ko e ngāue ki he ʻOtuá ʻoku tuha ia mo ha tuʻunga tuʻu-ki-muʻa ʻi heʻetau moʻuí. (1 Kolinito 7:​29-​31) ʻIkai ko ia pē, ʻoku tuipau ʻa e kau Kalisitiane moʻoní ʻe ʻikai liʻaki kinautolu ʻe he ʻOtuá.​—2/1, peesi 4-6.

• Ko fē ʻoku ʻuluaki lave ai ki ha ʻōlita ʻi he Tohitapú?

ʻOku ʻi he Senesi 8:​20, ʻi he lave ki he ʻōlita naʻe langa ʻe Noa ʻi heʻene mavahe mei he ʻaʻaké hili ʻa e Lōvaí. Kae kehe, ʻoku ngalingali, naʻe ngāueʻaki ʻe Keini mo ʻĒpeli ʻa e ongo ʻōlita ʻi hono fai ʻena feilaulaú. (Senesi 4:​3, 4)​—2/15, peesi 28.

• ʻOku lava fēfē ke ngāueleleiʻaki ʻe ha kau Kalisitiane ʻa e ngaahi tuʻunga feliliuakí?

Kuo tali ʻe he niʻihi—pe kamata—ʻa e ngaahi liliu ʻi heʻenau ngāué ʻa ia kuo ʻoange ai kia kinautolu ʻa e taimi lahi ange ki he ngāue fakafaifekaú. Kuo fakalahi ʻe he niʻihi kehe ʻa honau taimi mo e ngaahi monū ʻi he ngāue ʻa e ʻOtuá ʻi he taimi ʻoku holo hifo ai honau ngaahi fatongia fakafāmilí, hangē ko e taimi ko ia ʻoku hoko ai ʻenau fānaú ko e kakai lalahi pea nau malí.​—3/1, peesi 19-​22.

• ʻOku anga-fēfē hono tokoniʻi kitautolu ʻe he faʻifaʻitakiʻanga ʻa Siona mo e ʻapositolo ko Pitá ke mamata ki he niʻihi kehé ʻo hangē ko e mamata ʻa Sihova kia kinautolú?

Fakatouʻosi ʻa Siona mo Pita naʻe ʻi ai ʻena ngaahi fehālaaki ʻiloa ʻi heʻena fakakaukaú pea ʻi he founga ʻo ʻena tali ki he ngaahi ʻahiʻahiʻi ʻo e tuí mo e talangofuá. Neongo ia, naʻe ʻafioʻi lelei ʻe Sihova ʻa e ngaahi ʻulungaanga lelei ʻia kinauá pea hokohoko atu hono ngāueʻaki kinaua ʻi heʻene ngāué. ʻI he taimi ʻoku fakaʻitaʻi pe fakalotomamahiʻi ai kitautolu ʻe he niʻihi kehé, ʻe lava ke tau hangataha ki honau ngaahi ʻulungaanga lelei ʻa ia kuo tau ʻiloʻi naʻe fakamānako ʻi he kuohilí pea ʻi he lelei ʻoku vakai ki ai ʻa e ʻOtuá ʻia kinautolú.​—3/15, peesi 16-​19.

• Ko e hā ʻoku kehekehe ai ʻa e ngaahi liliu Tohitapú ʻi hono fakafika ʻa e tohi Sāmé?

ʻOku ʻi ai ha faikehekehe ʻi hono fakafika ʻi he vahaʻa ʻo e tohi ʻi he muʻaki lea faka-Hepeluú pea ʻi hono liliu ki he faka-Kalisí ʻi he Septuagint. ʻE kehekehe nai ai ʻa e ngaahi liliu ki muí ni maí, ʻo fakatuʻunga pe naʻe makatuʻunga ia ʻi he konga tohi faka-Hepeluú pe ʻi he Septuagint.​—4/1, peesi 31.