“Maʻu ha Konisēnisi Lelei”
“TUKU ke tataki koe ʻe ho konisēnisí,” ko e faleʻi ia ʻoku faʻa fai ʻa e fanongo ki ai. Ka ke hoko hotau konisēnisí ko ha tataki alafalalaʻanga, ʻoku fiemaʻu ke akoʻi lelei ia ki he tonú mo e halá, pea kuo pau ke tau ongongofua ki heʻene tatakí.
Fakakaukau angé ki he meʻa naʻe hokosia ʻe ha tangata ko hono hingoá ko Sākeasi, hangē ko ia ʻoku lēkooti ʻi he Tohitapú. Ko Sākeasi, ʻa ia naʻe nofo ʻi Sielikoó, ko ha pule tānaki tukuhau ia pea ko ha tangata koloaʻia. Naʻá ne fakahaaʻi pē ʻe ia, naʻá ne maʻu ʻa ʻene koloá fakafou ʻi he ngāue hala—ko ha tōʻonga ia naʻá ne fakamamahiʻi moʻoni ʻa e niʻihi kehé. Naʻe fakahohaʻasi ʻa Sākeasi ʻe hono konisēnisí ʻi heʻene ngaahi ngāue taʻemāʻoniʻoní? Kapau naʻe pehē, ʻoku hā mahino naʻá ne tukunoaʻi ia.—Luke 19:1-7.
Kae kehe, naʻe malanga hake ha tuʻunga, ʻa ia naʻe fakatupunga ai ke toe fakakaukau ʻa Sākeasi ki hono ʻalungá. Naʻe haʻu ʻa Sīsū ki Sielikō. Ko e pukupuku ko Sākeasí naʻá ne loto ke lava ʻo sio kiate ia, ka naʻe ʻikai te ne lava ke sio kiate ia koeʻuhí ko e fuʻu kakaí. Ko ia, naʻá ne lele ki muʻa ʻo kaka ʻi ha fuʻu ʻakau ke sio lelei ange ai. ʻI he maongo ki ai ʻa e mahuʻingaʻia lahi ʻa Sākeasí, naʻe tala ange ki ai ʻe Sīsū te ne ʻaʻahi kiate ia ʻi hono ʻapí. Naʻe fakaaʻu fiefia ʻe Sākeasi ʻa e anga-talitali kakaí ki heʻene tokotaha fakaafe ʻiloá.
Ko e meʻa naʻe mamata ai mo fanongoa ʻe Sākeasi lolotonga ʻa e feohi mo Sīsuú naʻe maongo ki hono lotó pea ueʻi ai ia ke liliu ʻa ʻene ngaahi foungá. Naʻá ne fakahaaʻi: “Ko eni te u ʻatu ni hono vaeua ʻo ʻeku ngaʻotoʻota ki he masiva; pea kapau kuo u maʻu ha meʻa ʻi he lohiakiʻi ha taha, te u toe totongi ni, ʻo liunga fa.”—Luke 19:8.
Naʻe akoʻi ʻa e konisēnisi ʻo Sākeasí, pea naʻá ne fanongo pea fai ha tali ki ai. Ko e ngaahi ola leleí naʻe lahi. Fakaʻuta atu ki he anga ʻo e ongoʻi ʻa Sākeasí ʻi he taimi naʻe tala ange ai ʻe Sīsū kiate ia: “Ko e ʻaho ni kuo hoko mai ʻa e fakamoʻui ki he fale ni!”—Luke 19:9.
Ko ha faʻifaʻitakiʻanga fakalototoʻa moʻoni ia! ʻOku fakahaaʻi ai ko e hā pē ha ʻalunga kuo tau tuli ki ai ki muʻa, ʻe lava ke tau liliu. Hangē ko Sākeasí, ʻe lava ke tau tokanga ki he ngaahi lea ʻa Sīsū—ʻoku lēkooti ʻi he Tohitapú—pea fakatupulekina ʻetau ʻiloʻi ʻa e tonú mo e halá. Te tau lava leva, hangē ko ia naʻe ekinaki ʻe he ʻapositolo ko Pitá, ʻo “maʻu ha konisēnisi lelei.” ʻE lava ke tau fanongo ki hotau konisēnisi kuo akoʻí pea fai ʻa e meʻa ʻoku totonú.—1 Pita 3:16, NW.