Fakafiemālie ki he Faʻahinga ʻOku Tangi ki ha Tokoní
KO E Tohitapú ʻoku ʻikai ko ha tohi ia ki he moʻuilelei fakaeʻatamaí. Kae kehe, ʻokú ne ʻomai kia kitautolu ʻa e fakafiemālie pea tokoniʻi kitautolu ke tau fiefia ʻi he moʻuí neongo ʻa e ngaahi faingataʻa ʻoku tau fetaulaki mo iá. Ko e moʻoni, ʻoku pehē ʻe he ngaahi Konga Tohitapú: “Ko e tangata kuo fanauʻi ʻe he fefine ʻoku fuonounou ʻene moʻui, pea ʻoku fonu ʻi he mamahi.” (Siope 14:1) Ko ʻetau taʻehaohaoá tonu ʻoku tupu mei ai ʻa e niʻihi ʻo hotau ngaahi ʻahiʻahí. Ka ko hai ʻoku tupu tefito mei ai ʻa e faingataʻaʻia ʻa e tangatá?
ʻOku fakamatalaʻi ʻe he Tohitapú ʻa e tokotaha ko iá ko ha laumālie fulikivanu ʻoku ui ko e Tēvoló mo Sētane. Ko iá “ʻoku ne kākāʻi ʻa mamani kātoa” pea fakatupunga ʻa e ngaahi faingataʻa lahi ʻoku tofanga ai ʻa e faʻahinga ʻo e tangatá. Ka, ʻoku toe tala mai ʻe he Tohitapú kia kitautolu kuo ofi ke ngata ʻa hono taimí. (Fakahā 12:9, 12) ʻOku vavé ni ke ngata ʻa e faingataʻa kotoa kuo ʻomai ʻe Sētane ki he kau nofo ʻi he māmaní ʻaki ʻa e kau tonu mai ki ai ʻa e ʻOtuá. Fakatatau ki he Tohitapú, ʻe fakangata ʻe he māmani foʻou māʻoniʻoni kuo talaʻofaʻaki ʻe he ʻOtuá ʻa e ʻikai ha ʻamanakí mo e ʻamanaki-tōnoá.—2 Pita 3:13.
Ko ha fakafiemālie ē ke ʻilo ko e faingataʻaʻia ʻa e tangatá ʻoku fakataimi pē! ʻI he malumalu ʻo e pule ʻa e Puleʻanga fakahēvani ʻo e ʻOtuá ʻi he mafai ʻo Sīsū Kalaisí, ʻe fakangata ai ʻa e fakamaau taʻetotonú mo e faingataʻaʻiá. Fekauʻaki mo e Tuʻi fakanofo ʻa e ʻOtuá, ʻoku fakahā mai ʻe he ngaahi Konga Tohitapú: “He ʻoku ne fakahaofi ʻa e masiva ʻo ka tangi; ko e vaivai foki mo ia ʻoku ʻikai hano tokoni. Ko e tuʻutamaki mo e masiva ʻoku ne fakaʻatuʻi, pea ko e ngaahi laumalie ʻo e masiva ʻoku ne fakamoʻui. ʻOku ne huhuʻi honau laumalie mei he maumau mo e fakamalohi, pea ʻoku mahuʻinga honau toto ʻi heʻene vakai.”—Sāme 72:12-14.
Ko e taimi ke fakahoko ai ʻa e ngaahi lea fakaekikite ko ʻení ʻoku fuʻu ofi. Te tau malava ke fiefia ai ʻi he moʻui taʻengata ʻi ha māmani palataisi ʻi he malumalu ʻo e ngaahi tuʻunga fakaofo. (Luke 23:43; Sione 17:3) Ko hono ʻiloʻi ʻa e ngaahi talaʻofa Fakatohitapu fakafiemālie ko ʻení ʻoku ʻomai ai ʻa e ʻamanaki mo e fakafiemālie ki he faʻahinga ʻoku tangi ki ha tokoní.
[Maʻuʻanga ʻo e Fakatātā ʻi he peesi 32]
Taʻahine loto-mafasia: Photo ILO/J. Maillard