ʻOkú Ke “ʻAkahi ʻa e Tao Fakateká”?
ʻI HE taimi ʻo e Tohitapú, ko ha tao fakateka pulu—ko ha fuʻu vaʻakau lōloa, ʻoku faʻa ʻai ʻi hono matá ha talatala mētale māsila—naʻe ngāueʻaki ia ki hono fakateka mo hono tataki ʻa e fanga monumanu ngāué. Kapau naʻe talitekeʻi fefeka ʻe he monumanú ʻa e mahuhuhuhu ʻa e tao fakateká ʻaki haʻane teke ia, ko e hā naʻe hokó? ʻI he ʻikai maʻu ha fiemālié, naʻá ne fakatupunga ai pē ʻa e mamahi kiate ia.
Ko Sīsū Kalaisi naʻe toetuʻú naʻá ne lea fekauʻaki mo e tao fakateká ʻi heʻene hā ki ha tangata naʻe hingoa ko Saula, ʻa ia naʻá ne fononga atu ke puke ha niʻihi ʻo e kau ākonga ʻa Sīsuú. Mei he lotolotonga ʻo ha maama fakatupu kui, naʻe fanongo ai ʻa Saula ki he pehē ʻe Sīsū: “ʻE Saula, ʻe Saula, ko e hā ʻokú ke fakatangaʻi ai aú? Ke hanganaki ʻakahi ʻa e tao fakateká ʻokú ne ʻai ke ke faingataʻaʻia ai.” ʻI hono ngaohikovia ʻa e kau Kalisitiané, naʻe faitau moʻoni ai ʻa Saula ki he ʻOtuá, ʻi he tuli ki ha ʻalunga ʻa ia ʻe lava ke fakatupu maumau pē kiate ia tonu.—Ngāue 26:14, NW.
ʻE lava ke tau hoko taʻefakakaukauʻi mo kitautolu ʻo “ʻakahi ʻa e tao fakateká”? ʻOku fakatatau ʻe he Tohitapú ʻa e “ngaahi lea ʻa e kau poto” ki he tao fakateka pulu ʻokú ne fakaʻaiʻai kitautolu ke ngaʻunu ki muʻa ʻi he feituʻu totonú. (Koheleti 12:11) Ko e akonaki fakamānavaʻi ʻi he Folofola ʻa e ʻOtuá ʻe lava ke ne ueʻi mo tataki totonu kitautolu—kapau te tau fakaʻatā ia. (2 Timote 3:16) Ko hono talitekeʻi ʻene ngaahi fakaʻaiʻaí ʻe hoko pē ko e fakatupu maumau kia kitautolu.
Naʻe tokanga ʻa Saula ki he ngaahi lea ʻa Sīsuú, ʻo liliu hono ʻalungá, peá ne hoko ai ko e ʻapositolo Kalisitiane ʻofeina ko Paulá. Ko ʻetau tokanga ki he akonaki fakaʻotuá te ne ʻomai tatau kia kitautolu ʻa e ngaahi tāpuaki taʻengata.—Palovepi 3:1-6.
[Maʻuʻanga ʻo e Tā ʻi he peesi 32]
L. Chapons/Illustrirte Familien-Bibel nach der deutschen Uebersetzung Dr. Martin Luthers