“Naʻá Ku Maʻu ʻa e Kaumeʻa, ʻOfa, mo e Tokanga”
“KO E meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.” (Sione 13:35) Hangē pē ko e ngaahi lea ʻa Sīsuú, naʻe hoko ʻa e ʻofá ko e fakaʻilonga ia ʻo e muʻaki fetokouaʻaki faka-Kalisitiané. Ko Tetuliane, ʻi heʻene tohi ʻi he taʻu laka hake he teaú hili ʻa e pekia ʻa Kalaisí, naʻe hiki ʻe he kau hiki fakamatalá ʻa ʻene pehē: ‘Vakai ki he anga ʻo ʻenau feʻofaʻakí pea mo e anga ʻo ʻenau aʻu ʻo mateuteu ke mate maʻá e tokotaha ko ē.’
ʻE lava ke kei maʻu ʻa e faʻahinga ʻofa ko iá ʻi he māmaní? ʻIo. Ko e fakatātaá, fakakaukau ki ha tohi ʻa ia naʻe maʻu ʻe he ʻōfisi vaʻa ʻo e Kau Fakamoʻoni ʻa Sihova ʻi Pelēsilá. Ko e tokotaha faitohí, ko ha fefine ko hono hingoá ko Marília, naʻá ne tohi:
“Lolotonga ʻa e nofo ʻi Villa Mercedes, ʻĀsenitiná, ko ʻeku faʻeé, ʻa ia ko e taha ʻo e Kau Fakamoʻoni ʻa Sihová, naʻá ne maʻu ai ʻa e langa huí, ʻo fakatupunga ai ke ne mamatea mei hono konga lotó ki lalo. ʻI he ʻuluaki māhina ʻe valu ʻo ʻene puké, ko e Kau Fakamoʻoni ʻi Villa Mercedes naʻa nau tokangaʻi anga-ʻofa mo fakaʻatuʻi iá. Naʻa nau tokangaʻi ʻa e meʻa kotoa pē, fakamaʻa hono ʻapí mo hono teuteu ʻene meʻakaí. Naʻa mo e lolotonga ʻi he falemahakí, naʻe ʻi ai maʻu pē ʻa e tokotaha ʻi he fineʻeikí, ʻi he ʻaho mo e pō.
“Hili iá naʻá ku foki mo e fineʻeikí ki Pelēsila, ʻa ia ʻokú ne kei fakaakeake ai mei hono puké. Ko e Kau Fakamoʻoni ʻi he feituʻu ʻokú ma nofo ai he taimi ní ʻoku nau fai ʻa e meʻa kotoa pē ʻoku nau malavá ke tokoniʻi ʻa e fineʻeikí ʻi heʻene fakaakeaké.”
ʻOku fakaʻosiʻaki ʻe Marília ʻene tohí: “ʻOku ou fakahaaʻi moʻoni ko aú ʻoku ʻikai ko ha Fakamoʻoni, ka naʻá ku maʻu ʻa e kaumeʻa, ʻofa, mo e tokanga ʻi he haʻohaʻonga ʻo e Kau Fakamoʻoní.”
ʻIo, ʻoku kei ʻi ai pē ʻa e kakai ʻoku nau tōʻongaʻaki ʻa e ʻofa faka-Kalisitiane moʻoní. ʻI hono fai iá, ʻoku nau fakahāhā ai ʻa e mālohi ʻa ia ʻe lava ke fai ʻe he ngaahi akonaki ʻa Sīsuú ki heʻetau moʻuí.