Ko ha Konisēnisi Faitotonu

LOLOTONGA ʻa e fononga ki ʻapi ʻi he ʻaho ʻe taha mei he ngāué, ko Charles, ko ha toko taha ngāue ʻi ha ʻunivēsiti ʻi Keniā, naʻe mole ʻa ʻene telefoni selulaá. Ko e ngaahi meʻá ni ʻoku kei hoko pē eni ʻi Keniā ko ha meʻa fakatuʻumālie totongi mamafa.

“Naʻe ʻikai te u ʻamanekina ʻe fakafoki mai ia ʻe ha taha,” ko e lau ia ʻa Charles. Kae kehe, ʻi ha ngaahi ʻaho siʻi ki mui aí, naʻá ne ʻohovale ʻi he maʻu ha telefoni mei he ʻōfisi vaʻa ʻo e Kau Fakamoʻoni ʻa Sihova ʻi Keniaá. Naʻe ʻikai meimei lava ke ne tui ki he meʻa naʻá ne fanongo ki aí ʻi hono kole ange ke ne haʻu ʻo ʻave ʻa ʻene telefoni selulaá! Naʻá ne ʻiloʻi ai ko ha faifekau taimi-kakato ʻa e Kau Fakamoʻoni ʻa Sihová naʻá ne heka ʻi he meʻalele tatau naʻe heka ai ʻa Charles pea naʻá ne ʻilo ʻa e telefoní. ʻI ha feinga ke maʻu ʻa e toko taha naʻe ʻaʻaná, naʻe ʻave ʻe he faifekaú ʻa e telefoní ki he ʻōfisi vaʻá, pea ko e kau ngāue pole ʻi aí naʻe faifai pē ʻo nau ʻiloʻi ʻa Charles ʻaki hono fakatotoloʻi ʻa e fika naʻe ʻasi ʻi he telefoní.

“ʻOku ou houngaʻia ʻaupito ʻi he ngaahi feinga naʻe fai ke fetuʻutaki mai kiate au neongo ʻa e ngaahi tuʻunga faingataʻa naʻe kau ki aí,” ko e lau ia ʻa Charles ʻi ha tohi naʻá ne fai ki he ʻōfisi vaʻá. “ʻOku ou fakamālō loto-moʻoni atu ki he kau mēmipa ʻo hoʻomou kautahá ʻa ia naʻa nau ʻilo ʻa e telefoni selulaá, ʻo ʻiloʻi naʻe ʻaʻaku, pea fakafoki mai iá. ʻOku ʻikai faingofua ke maʻu ha toko taha faitotonu ʻi he ʻahó ni, ka ʻoku fakalototoʻa ʻa ʻetau maʻu ha tokosiʻi ʻoku nau tuʻu ʻo ʻiloa ko e Kau Fakamoʻoni moʻoni ʻa Sihova ko e ʻOtuá.”

Ko e Kau Fakamoʻoni ʻa Sihová ʻi he feituʻu kotoa pē ʻoku nau ʻiloa ʻi heʻenau faitotonú. ʻOku nau faʻifaʻitaki ki he ʻapositolo ko Paulá, ʻa ia naʻá ne pehē: “ʻOku mau pehe ʻoku ʻataʻatā homau konisenisi: he ko homau loto ke tāu ʻemau moʻui [pe faitotonu] ʻi he meʻa kotoa.” (Hepelu 13:18; 1 Kolinito 11:1) ʻOku nau mahinoʻi ko e ʻulungāanga peheé ʻoku ʻave ai ʻa e lāngilangí kia Sihova ko e ʻOtuá, ʻo hangē ko ia naʻe leaʻaki ʻe Sīsuú: “Ke ulo atu hoʻomou māma ke hā ki he kakai, ke nau mamata ki hoʻomou ngāhi ngaue lelei, pea fakamāloʻia ʻa hoʻomou Tamai ʻoku ʻi Hevani.”—Mātiu 5:16.