Ko e Hā ʻOku Toutou ʻAʻahi Atu Ai kia Koe ʻa e Kau Fakamoʻoni ʻa Sihová?

ʻOKU ʻiloa ʻi māmani lahi, ʻa e kīvoi ʻa ia ʻoku fai ʻe he Kau Fakamoʻoni ʻa Sihová ʻi heʻenau kau ki heʻenau ngāue fakafaifekau fale-ki-he-falé. ʻOku fifili ʻa e kakai ʻe niʻihi ki he ʻuhinga ʻoku toutou ʻaʻahi ange ai kia kinautolu ʻa e Kau Fakamoʻoní, tautefito kapau naʻa nau fakahaaʻi ha kiʻi mahuʻingaʻia ki muʻa ʻi he pōpoaki ʻa e Kau Fakamoʻoní. ʻOku tokoni ha tohi ʻe ua mei Lūsia ke fakamatalaʻi ʻa e ʻuhingá.

“Ko ʻeku lea moʻoni,” ko e fakahaaʻi ia ʻe Masha, ko ha taʻahine taʻu 19 ʻi Khabarovsk, “ʻi he kuohilí, naʻá ku feinga lahi ai ke fakaʻehiʻehi mei he Kau Fakamoʻoni ʻa Sihová.” Kae kehe, hili hono lau ha ngaahi tatau siʻi ʻo e ʻū makasini naʻe pulusi ʻe he Kau Fakamoʻoní, naʻá ne liliu ʻa ʻene fakakaukaú. “ʻOku mātuʻaki mahuʻinga mo fakamaama kotoa ia,” ko e tohi ia ʻa Masha, “ka ko e meʻa ʻoku mahuʻinga tahá, ʻokú ne ʻai koe ke kehe ʻa hoʻo sio ki he māmaní. Naʻá ku kamata māmālie ke mahinoʻi ʻa e ʻuhinga ʻoku ʻoange ai ki he kakaí ha taumuʻa ki he moʻuí.”

Mei he kolo ko Ussuriysk, ʻi he kilomita nai ʻe 80 ʻi he tokelau ʻo Vladivostok, naʻe tohi ai ʻe Svetlana: “Naʻá ku toki kamata ki muí ni ke lau ʻa e Taua Leʻo mo e ʻĀ Hake! Ko e ongo makasini ko ení ʻoku fiemaʻu lahi ia ʻi hotau ʻahó mo e kuongá. ʻOku ou fiefia ʻi he ngaahi kupú kotoa. ʻOku nau mātuʻaki mahuʻinga, fakatupu-ʻilo, pea fakamaama. Fakamālō atu! Fakamālō lahi atu ki hoʻomou ʻi he māmani ko ení pea ʻi hono fai ha ngāue anga-ʻofa mo fiemaʻu pehē.”

Ko e Kau Fakamoʻoni ʻa Sihová ʻi he māmaní kotoa ʻoku nau fakakaukau fakamātoato ki he fehuʻi fakatupu fakakaukau ʻa e ʻapositolo ko Paulá: “Pea fefe haʻanau fanongo [ʻa e kakaí] ʻoka ʻikai ha taha ke malanga?” (Loma 10:14) Ko e hā ʻoku ʻikai vaheʻi ai ha ngaahi miniti siʻi ke fanongo ʻi he taimi hoko mai ʻoku ʻaʻahi atu ai kia koe ʻa e Kau Fakamoʻoní? Ko koe foki ʻe lava ke ke fiefia ʻi he pōpoaki ʻo e fakafiemālie ʻoku maʻu ʻi he Folofola ʻa e ʻOtuá, ʻa e Tohi Tapú.