ʻE Lava ke Fakamoʻui ʻe he Tuí ʻa e Toko Taha Puké?

ʻI HE puké, ʻoku tau kumi ki ha fakafiemālie mo ha faitoʻo. Ngalingali, ʻokú ke ʻiloʻi mei he Tohi Tapú naʻe toutou fakamoʻui ʻe Sīsū Kalaisi ʻa e mahaki kotoa pē, ʻo ʻoatu ai ʻa e fakafiemālie ki he kau faingataʻaʻia tokolahi. Naʻe anga-fēfē ʻa e hoko ʻa e ngaahi fakamoʻui ko iá? ʻI he “māfimafi ʻo e ʻOtua,” ko e lau ia ʻa e Tohi Tapú. (Luke 9:​42, 43; Ngāue 19:​11, 12) Ko ia ai, ko e laumālie māʻoniʻoni mei he ʻOtuá naʻá ne fakatupunga ʻa e fakamoʻuí, ʻo ʻikai ko e tui pē ia ʻa e toko tahá. (Ngāue 28:​7-9) Ko e ʻuhinga ia naʻe ʻikai fiemaʻu ai ʻe Sīsū ʻa e kakai puké ke nau fai ha fakahāhā ʻo ʻenau tui kiate iá koeʻuhi ke fakamoʻui ai kinautolu.

Te ke fifili nai: ‘Ko e ngaahi fakamoʻui fakaemaná ko ha meʻa pē ia he kuohilí, pe ʻe toe hoko ʻa e faʻahinga fakamoʻui ko ia naʻe fakahoko ʻe Sīsuú? Ko e hā ʻa e ʻamanaki ʻoku ʻi ai ki he faʻahinga ʻoku nau faingataʻaʻia mei ha mahaki ʻoku langa pe ʻikai lava ke faitoʻó?’

ʻOku fakamatala ʻa e Tohi Tapú ʻo pehē ʻi he māmani foʻou ʻo e māʻoniʻoni ʻa e ʻOtuá, ko e māfimafi ʻo e ʻOtuá te ne toe ueʻi ʻa e faʻahinga fakamoʻui fakaemana ko ia naʻe fakahoko ʻe Sīsū lolotonga ʻene ʻi māmaní. Ko e Kau Fakamoʻoni ʻa Sihova ʻi ho feituʻú te nau fiefia ke fakahaaʻi atu kiate koe ʻa e founga mo e taimi ʻe fakahoko ai ʻe he ʻOtuá ʻa e meʻa ʻe ʻikai faifai ange pea lava ʻe ha toko taha faifakamoʻui ʻi he tuí—ko hono fakangata ʻa e mahaki kotoa pē, pea pehē ki he maté. ʻIo, ko e ʻOtuá “te ne folofua ʻa mate ʻo taʻengata.”—Aisea 25:8.