ʻOku Fai ʻa e Finangalo ʻo e ʻOtuá?

“Ke hoko hoʻo Pule, ke fai ho Finangalo, hange ko ia ʻi he langi ke pehe foki ʻi māmani.”​—Mātiu 6:​10.

NAʻE mamata ʻi he fakalilifuʻia ʻa Julio mo Christina ʻi he vela ʻo mate ʻa ʻena fānau ʻe toko faá. Ko ʻena kā naʻe taú naʻe tuiʻi ia ʻe ha fakaʻuli konā, pea naʻe pā ia ʻo puho. Ko ha kiʻi leka hono nima, ko Marcos, naʻe fakahaofi ia mei ha vela lahi, ka naʻe māngia ʻa hono sinó ʻi he uló, ʻo maumauʻi ʻosi ai ʻa hono fōtungá. Naʻá ne taʻu hiva. Naʻe mamahi lahi fau ʻa ʻene tamaí. Naʻá ne fakafiemālieʻi ia pea mo hono fāmilí ʻaki ʻa e ngaahi lea: “Ko e finangalo eni ʻo e ʻOtuá, kuo pau ke tau mahinoʻi ʻa e meʻa ko iá, lelei, kovi, pe ko e hā pē ha meʻa.”

ʻI he fehangahangai mo ha meʻa fakamamahi hangē ko ení, ʻoku meimei tatau e tali ʻa e tokolahi. ‘Kapau ʻoku mālohi tāfataha ʻa e ʻOtuá pea tokanga mai kia kitautolu,’ ko ʻenau fakaʻuhingá ia, ‘ko e meʻa kuo hokó kuo pau pē ʻoku maʻa ʻetau leleí ʻi ha founga, neongo nai ʻa e faingataʻa ke mahinoʻí.’ ʻOkú ke loto-tatau mo ia?

Ko e vakai ko ia ko e hā pē ʻoku hokó, lelei pe kovi, ʻoku fakaeʻa ai ʻa e finangalo ʻo e ʻOtuá ʻoku faʻa makatuʻunga ia ʻi he ngaahi lea ʻa Sīsū ʻi he meʻa ʻoku ui ko e Lotu ʻa e ʻEikí, ʻa ia ʻoku hiki ʻi ʻolungá. ʻOku fai ʻa e finangalo ʻo e ʻOtuá ʻi hēvani, ʻikai ko ia? ʻI he lotu ‘ke fai ho Finangaló ʻi māmaní,’ ʻikai ʻoku tau tali ai ki he meʻa ʻoku hoko ʻi he māmaní ʻi he tuʻunga ko e finangalo ia ʻo e ʻOtuá?

ʻOku taʻefakafiemālie ki he tokolahi ʻa e fakakaukau ko ení. Kia kinautolu, ʻoku fakahaaʻi ai ko e ʻOtuá ʻoku ʻikai ongongofua ki he ngaahi ongoʻi ʻa ʻene meʻa fakatupu fakaetangatá. ‘ʻE lava fēfē ke finangalo ha ʻOtua ʻofa ke hoko ha meʻa fakalilifu ki he kakai tonuhiá?’ ko ʻenau ʻeké ia. ‘Kapau ʻoku ʻi ai ha lēsoni ke ako, ko e hā nai ʻa e lēsoni ko iá?’ Mahalo pē ko e anga ia ʻo hoʻo ongoʻí.

ʻI he fekauʻaki mo e meʻá ni, ko e tokoua faʻē-taha ʻo Sīsuú, ʻa e ākonga ko Sēmisí, naʻá ne tohi: “Ke ʻoua naʻa lau ʻe ha toko taha ʻO ka ʻahiʻahiʻi, ʻOku mei he ʻOtua hoku ʻahiʻahiʻi: he ko e ʻOtua ʻoku ʻikai maʻahiʻahiʻi ʻe he kovi, pea ʻoku ʻikai ke ʻahiʻahiʻi ha taha ʻe he ʻEne ʻAfio.” (Semisi 1:13) Ko e ʻOtuá ʻoku ʻikai ko e matavai ia ʻo e meʻa ʻoku koví. Ko ia ai, ʻoku hā mahino, ko e meʻa kotoa ʻoku hoko ʻi he māmaní he ʻaho ní ʻoku ʻikai ko e finangalo ia ʻo e ʻOtuá. ʻOku toe lau ʻa e ngaahi Konga Tohi Tapú fekauʻaki mo e loto ʻo e tangatá, ko e loto ʻo e ngaahi puleʻangá, pea naʻa mo e loto ʻo e Tēvoló. (Sione 1:​13; 2 Timote 2:​26; 1 Pita 4:3) ʻOkú ke loto-tatau ko e meʻa naʻe hoko ki he fāmili ʻo Julio mo Christina ʻoku ʻikai lava ke pehē ko e finangalo ia ʻo ha Tamai fakahēvani ʻofa?

Ko ia, ko e hā naʻe ʻuhinga ki ai ʻa Sīsū ʻi he taimi naʻá ne akoʻi ai ʻene kau ākongá ke nau lotu: ‘Ke fai ho Finangaló’? Ko ha kole pē ia ki he ʻOtuá ke ne kau mai ʻi ha ngaahi tuʻunga tefito, pe naʻe akoʻi ʻe Sīsū kitautolu ke tau lotu ki ha meʻa lahi ange mo lelei ange, ko ha liliu ʻa ia ʻe lava ke ʻamanaki ki ai ʻa e tokotaha kotoa? Tau sivisiviʻi lahi angé ʻa e meʻa ʻoku leaʻaki ʻe he Tohi Tapú.

[Maʻuʻanga Tā ʻi he peesi 3]

Kā: Dominique Faget-STF/AFP/Getty Images; kiʻi tama: FAO photo/B. Imevbore